തിരുവനന്തപുരം: സ്വർണക്കടത്ത് കേസുമായി ബന്ധപ്പെട്ട് തിരുവനന്തപുരത്തെ മണി എക്സ്ചേഞ്ച് കമ്പനിയായ യു.എഫ്.എക്സ് സൊല്യൂഷൻസ് എന്ന സ്ഥാപനത്തിന്റെ ഡയറക്ടർമാരിൽ ഒരാളായ അബ്ദുൽ ലത്തീഫിനെ കസ്റ്റംസ് ചോദ്യം ചെയ്തു. ബിനീഷ് കോടിയേരിയുടെ ബിനാമിയാണ് ഇയാൾ എന്ന് ആരോപണം ഉയർന്നിരുന്നു.
Also Read: ലൈഫ് മിഷന്; യു വി ജോസിനെ സിബിഐ ഇന്ന് ചോദ്യം ചെയ്യും
തിരുവനന്തപുരത്തെ ഓഫീസിലേക്ക് വിളിച്ച് വരുത്തി സ്വപ്നാ സുരേഷിനെ കുറിച്ചും സ്വർണക്കടത്തിനെ കുറിച്ചുമാണ് കസ്റ്റംസ് ചോദിച്ചറിഞ്ഞത്. യു.എഫ്.എക്സിൽ നിന്ന് കമ്മീഷൻ ലഭിച്ചിരുന്നു എന്ന് നേരത്തെ സ്വപ്നാ സുരേഷ് മൊഴി നൽകിയിരുന്നു. ഇതിനെ തുടർന്നാണ് അബ്ദുൽ ലത്തീഫിനെ ചോദ്യം ചെയ്തത്.
യുഎഇ കോൺസുലേറ്റുമായി ബന്ധപ്പെട്ട് പ്രവർത്തിക്കുന്ന സ്ഥാപനമാണ് യു.എഫ്.എക്സ്. കോൺസുലേറ്റിലെ വിസാ സ്റ്റാമ്പിങ് അടക്കമുള്ള കരാർ ഈ കമ്പനി ഏറ്റെടുത്തിരുന്നു. കൂടാതെ, സ്വപ്നാ സുരേഷിന്റെ താൽപര്യ പ്രകാരമാണ് കോൺസുലേറ്റ് ഈ കമ്പനിയെ തെരഞ്ഞെടുത്തതെന്നും ആരോപണം ഉയർന്നിരുന്നു.