കോഴിക്കോട് : കരിപ്പൂര്‍ അന്താരാഷ്‌ട്ര വിമാനത്താവളത്തില്‍ വീണ്ടും വന്‍ സ്വര്‍ണ്ണവേട്ട. അനധികൃതമായി കടത്താന്‍ ശ്രമിച്ച 70 ലക്ഷം രൂപയുടെ സ്വര്‍ണ്ണമാണ് എയര്‍ കസ്‌റ്റംസ് ഇന്റലിജന്‍സ് പിടികൂടിയത്. സ്വര്‍ണ്ണം കടത്താന്‍ ശ്രമിച്ച 8 പേരെ ഉദ്യോഗസ്‌ഥര്‍ അറസ്‌റ്റ് ചെയ്‌തു.
ഏകദേശം 1,370 ഗ്രാം വരുന്ന സ്വര്‍ണ്ണമാണ് ഇവര്‍ വിമാനത്താവളം വഴി കടത്താന്‍ ശ്രമിച്ചത്. ഈന്തപ്പഴം, ചോക്‌ളേറ്റ് എന്നിവയുടെ ഉള്ളിലായി പേസ്‌റ്റ് രൂപത്തിലാക്കിയാണ് ഇവര്‍ സ്വര്‍ണ്ണം കടത്തിയത്. സംഭവത്തില്‍ അറസ്‌റ്റിലായവര്‍ കര്‍ണാടക, കാസര്‍ഗോഡ്, വയനാട് സ്വദേശികളാണ്.
കര്‍ണാടക ശിവമൊഗ്ഗ സ്വദേശിയായ ഷബീര്‍, കാസറഗോഡ് സ്വദേശികളായ അബ്ബാസ്, അസ്‌ലം, മുഹമ്മദ് കുഞ്ഞ്, നിഷാജ്, ലത്തീഫ്, ബിലാല്‍, വയനാട് സ്വദേശിയായ ബഷീര്‍ എന്നിവരെയാണ് സംഭവത്തിന്റെ ഭാഗമായി കസ്‌റ്റംസ് അധികൃതര്‍ അറസ്‌റ്റ് ചെയ്‌തത്.
Read also : കര്‍ഷകരുമായി കേന്ദ്രം ചര്‍ച്ച തുടങ്ങി; ഇന്ന് പരിഹാരമാകുമെന്ന് കൃഷിമന്ത്രി
