മോസ്‌കോ: യുക്രൈനിൽ റഷ്യ നടത്തുന്ന അധിനിവേശത്തെ തുടർന്ന് ഹോളിവുഡ് ചിത്രങ്ങൾ റഷ്യയിൽ റിലീസ് ചെയ്യില്ലെന്ന് തീരുമാനിച്ച് നിർമാണ കമ്പനികൾ. യൂണിവേഴ്‌സ്, പാരമൗണ്ട്, സോണി, ഡിസ്‌നി, വാര്‍ണര്‍ ബ്രോസ് എന്നീ നിർമാണ കമ്പനികളാണ് നിലവിൽ തങ്ങളുടെ ഏറ്റവും പുതിയ ചിത്രങ്ങൾ റഷ്യയിൽ റിലീസ് ചെയ്യുന്നില്ലെന്ന് തീരുമാനിച്ചത്.
റഷ്യയിൽ തങ്ങളുടെ ചിത്രങ്ങൾ റിലീസ് ചെയ്യുന്നതിൽ നിന്നും പിൻമാറുകയാണെന്ന് വ്യക്‌തമാക്കി ആദ്യം രംഗത്ത് വന്നത് ഡിസ്‌നിയാണ്. പുതിയ ചിത്രമായ ടേണിങ് റെഡ് മാര്‍ച്ച് 10ന് റഷ്യയില്‍ റിലീസ് ചെയ്യാന്‍ തീരുമാനിച്ചിരുന്നു. എന്നാൽ യുക്രൈനിൽ റഷ്യ നടത്തുന്ന അധിനിവേശത്തെ തുടർന്ന് ഈ തീരുമാനം പിൻവലിക്കുകയാണെന്നാണ് ഡിസ്‌നി പിന്നീട് വ്യക്‌തമാക്കിയത്‌. യാതൊരു പ്രകോപനവും ഇല്ലാതെ യുക്രൈനെ റഷ്യ ആക്രമിക്കുകയും, സാധാരണക്കാരായ ആളുകളെ കടുത്ത പ്രതിസന്ധിയിലേക്ക് തള്ളി വിടുകയും ചെയ്‌തുവെന്നും സിഡ്‌നി പറഞ്ഞു. കൂടാതെ യുക്രൈനെതിരെ ഉള്ള സൈനിക നടപടി തുടരുന്ന കാലത്തോളം റഷ്യയിൽ ചിത്രങ്ങൾ റിലീസ് ചെയ്യില്ലെന്നും സിഡ്‌നി കൂട്ടിച്ചേർത്തു.
ചിത്രങ്ങൾ റിലീസ് ചെയ്യുന്നതിൽ നിന്നും സിഡ്‌നി പിൻമാറിയതിന് പിന്നാലെ വാര്‍ണര്‍ ബ്രോസിന്റെ ബാറ്റ്മാന്‍, സോണിയുടെ മൊര്‍ബിയസ്, പാരമൗണ്ടിന്റെ ദ ലോസ്‌റ്റ് സിറ്റി തുടങ്ങിയ ചിത്രങ്ങളും റഷ്യയിൽ റിലീസ് ചെയ്യില്ലെന്ന് വ്യക്‌തമാക്കി.
Read also: 2022 പാരാലിമ്പിക്‌സ്‌; റഷ്യക്കും ബെലാറസിലും വിലക്ക് ഏർപ്പെടുത്തി
