കാഞ്ഞങ്ങാട്: ഇരിയ കാഞ്ഞിരടുക്കത്ത് എന്‍ഡോസള്‍ഫാന്‍ ദുരിതബാധിതരായ കുടുംബത്തോട് വീടൊഴിയാന്‍ നോട്ടീസ് നല്‍കിയ നടപടിയില്‍ പ്രതിഷേധിച്ച് യൂത്ത് കോണ്‍ഗ്രസ് പ്രവര്‍ത്തകര്‍ പുല്ലൂര്‍ വില്ലേജ് ഓഫീസറെ ഉപരോധിച്ചു.
എന്‍ഡോസള്‍ഫാന്‍ ദുരിതബാധിതരായ കുടുംബത്തിന് വീടൊഴിയാൻ നോട്ടീസ് നല്‍കിയത് മനുഷ്യത്വരഹിതമായ നടപടിയാണെന്നും അംഗീകരിക്കാന്‍ കഴിയില്ലെന്നും സമരക്കാര്‍ പറഞ്ഞു. നോട്ടീസ് ഉടന്‍ പിന്‍വലിച്ച് കുടുംബത്തിന് പട്ടയം ഉള്‍പ്പടെയുള്ള രേഖകള്‍ നല്‍കണമെന്ന് യൂത്ത് കോണ്‍ഗ്രസ് ജില്ലാ പ്രസിഡണ്ട് പ്രദീപ്കുമാര്‍ ആവശ്യപ്പെട്ടു.
വിഷയം കലക്‌ടറുടെ ശ്രദ്ധയില്‍പെടുത്തി അവരെ പട്ടികയില്‍ ഉള്‍പ്പെടുത്തി അതേ വീട് നല്‍കാന്‍ നടപടി സ്വീകരിക്കാമെന്നും അതുവരെ അനന്തര നടപടികള്‍ സ്വീകരിക്കില്ലെന്നും വില്ലേജ് ഓഫീസര്‍ ഉറപ്പ് നല്‍കിയതോടെയാണ് യൂത്ത് കോണ്‍ഗ്രസ് പ്രവര്‍ത്തകര്‍ സമരം അവസാനിപ്പിച്ചത്.
Read also: ഇഎംഎസ് സ്‌റ്റേഡിയം ഉൽഘാടനം 25ന്
