ന്യൂഡെൽഹി: കഴിഞ്ഞ കുറച്ച് നാളുകളായി വഷളായിരുന്ന ഇന്ത്യ-നേപ്പാൾ നയതന്ത്രം ബന്ധം മെച്ചപ്പെടുന്നു. ഇതിന്റെ ഭാഗമായി നേപ്പാൾ വിദേശകാര്യ മന്ത്രി പ്രദീപ് കുമാർ ഗ്യാവലി ഡിസംബറിൽ ഇന്ത്യ സന്ദർശിക്കും. ആദ്യമായാണ് നേപ്പാളിന്റെ ഭാഗത്ത് നിന്നും ഉന്നതതല പ്രതിനിധി രാജ്യം സന്ദർശിക്കുന്നത്. കഴിഞ്ഞ ദിവസം ഇന്ത്യയുടെ വിദേശകാര്യ സെക്രട്ടറി ഹർഷ് ശൃങ്ഗല നേപ്പാൾ സന്ദർശിച്ചിരുന്നു.
ഇന്ത്യയുടെ ഭാഗത്ത് നിന്നുള്ള മൂന്നാമത്തെ ഉന്നതതല പ്രതിനിധിയാണ് നേപ്പാൾ സന്ദർശിച്ചത്. നേരത്തെ കരസേനാ മേധാവിയും ഇന്റലിജൻസ് വിഭാഗം മേധാവിയും നേപ്പാൾ സന്ദർശിച്ചിരുന്നു. ഇന്ത്യൻ വിദേശകാര്യ മന്ത്രി എസ് ജയശങ്കറിന്റെ ക്ഷണപ്രകാരമാണ് ഗ്യാവലിയുടെ സന്ദർശനം.
ന്യൂഡെൽഹിയിൽ വെച്ച് നടക്കുന്ന ജോയിന്റ് കമ്മീഷൻ മീറ്റിംഗിൽ ഗ്യാവലി പങ്കെടുക്കും. കഴിഞ്ഞ വർഷം നടന്ന അഞ്ചാമത് ജോയിന്റ് കമ്മീഷൻ മീറ്റിംഗ്‌ കാഠ്‌മണ്ഡുവിൽ വെച്ചാണ് നടന്നത്. അന്ന് ഇന്ത്യയെ പ്രതിനിധീകരിച്ച് വിദേശകാര്യ മന്ത്രി എസ് ജയശങ്കറാണ് പങ്കെടുത്തത്.
Read Also: ഡെൽഹി ചലോ; ചർച്ചയിൽ കേന്ദ്ര നിർദേശങ്ങൾ തള്ളി കർഷക സംഘടനകൾ
