കണ്ണൂർ: സ്കൂട്ടറിന് കടന്നു പോകാൻ സൈഡ് നൽകിയില്ലെന്ന് ആരോപിച്ച് കെഎസ്ആർടിസി ഡ്രൈവർക്ക് മർദ്ദനം. കഴിഞ്ഞ ദിവസം വൈകിട്ട് നാലരയോടെ കൂത്തുപറമ്പിൽ നിന്നും തലശ്ശേരിയിലേക്കു യാത്രക്കാരുമായി വരികയായിരുന്ന കെഎസ്ആർടിസി ബസ് ഡ്രൈവറെയാണു രണ്ടുപേർ മർദ്ദിച്ചത്.
ഡ്രൈവറുടെ ഡോർ പിടിച്ചു വലിച്ചു തുറന്ന് പുറത്തേക്ക് ഇടാൻ ശ്രമിക്കുകയും ഡ്രൈവർ ചെറുത്തപ്പോൾ ഹെൽമെറ്റ് കൊണ്ട് അടിച്ച് പരിക്കേൽപ്പിക്കുകയും ചെയ്തു. മർദ്ദനം ചെറുത്ത ഡ്രൈവർക്ക് നേരെ രണ്ടംഗ സംഘം തെറിയഭിഷേകം നടത്തി.
ബസിന്റെ ഇൻഡിക്കേറ്റർ തകർക്കുകയും ചെയ്ത ഇവർ കൂടുതൽ ആളുകൾ എത്തുന്നതിനു മുൻപേ സ്ഥലം വിടുകയായിരുന്നു. കെഎസ്ആർടിസി ഡ്രൈവർ ചിറ്റാരിപ്പറമ്പ് സ്വദേശി കക്കോട്ടിൽ ഹൗസിൽ പ്രമോദി (53)നെയാണ് അക്രമിച്ചത്. സംഭവത്തിൽ പോലീസ് കേസെടുത്തു. പ്രതികൾ സഞ്ചരിച്ച KL. 58 Z. 7830 നമ്പർ സ്കൂട്ടർ പോലീസ് കസ്റ്റഡിയിൽ എടുത്തിട്ടുണ്ട്.
Most Read: ജാനകിക്കാട് കൂട്ടബലാൽസംഗം; കേസിൽ കൂടുതൽ പ്രതികളുണ്ടെന്ന് സൂചന