തിരുവനന്തപുരം: ആറ്റിങ്ങൽ കെഎസ്ആർടിസി ഡിപ്പോയിൽ പ്രതിഷേധ പൊങ്കാലയിട്ട് ജീവനക്കാർ. ശമ്പള പരിഷ്‌കരണം ഉൾപ്പടെയുള്ള ആവശ്യങ്ങൾ നടപ്പിലാകാത്തതിൽ പ്രതിഷേധിച്ച് സംയുക്‌ത സമര സമിതിയുടെ നേതൃത്വത്തിലാണ് ജീവനക്കാർ പൊങ്കാല ഇട്ടത്.
കെഎസ്ആർടിസി ജീവനക്കാരുടെ ആവശ്യങ്ങൾ അംഗീകരിക്കാത്തതിനാൽ നടന്നു വരുന്ന പ്രതിഷേധ പരിപാടികളുടെ അഞ്ചാം മുഖമായാണ് ആറ്റുകാൽ പൊങ്കാലയോട് അനുബന്ധിച്ച് 51 കലങ്ങളിലായി ജീവനക്കാർ പ്രതിഷേധ പൊങ്കാല ഇട്ടത്.
സംസ്‌ഥാനത്ത് സർക്കാർ ജീവനക്കാർക്കും പൊതുമേഖലാ ജീവനക്കാർക്കും ശമ്പള പരിഷ്‌കരണം നടപ്പിലാക്കിയെങ്കിലും തങ്ങളെ അവഗണിക്കുക ആയിരുന്നുവെന്ന് ജീവനക്കാർ പറയുന്നു.
പിൻവാതിൽ നിയമനത്തിലൂടെയല്ല തങ്ങൾ ജോലിയിൽ പ്രവേശിച്ചത്. മറ്റു സർക്കാർ ജീവനക്കാരെ പോലെ തന്നെ പിഎസ്‌സി പരീക്ഷ എഴുതി വിജയിച്ചാണ് തങ്ങളും ജോലിയിൽ പ്രവേശിച്ചത്. എന്നിട്ടും അർഹതപ്പെട്ട ആനുകൂല്യങ്ങൾ എന്തിനാണ് ഒഴിവാക്കിയത് എന്ന് അധികൃതർ മറുപടി പറയണമെന്നും ജീവനക്കാർ ആവശ്യപ്പെട്ടു.
ശമ്പള പരിഷ്‌കരണം ഉൾപ്പെടെയുള്ളവ നേടിയെടുക്കുന്നതിൽ തൊഴിലാളി യൂണിയനുകൾ പരാജയം കണ്ടതോടെയാണ് യൂണിയൻ വ്യത്യാസമില്ലാതെ ജീവനക്കാർ തങ്ങളുടെ ആവശ്യങ്ങൾ നേടിയെടുക്കാൻ സംയുക്‌ത സമര സമിതി എന്ന പേരിൽ ഒരു കൂട്ടായ്‌മ രൂപീകരിച്ചത്.
Read Also: മുല്ലപ്പള്ളിക്ക് തിരഞ്ഞെടുപ്പിൽ മൽസരിക്കാം, അധ്യക്ഷ സ്‌ഥാനം തടസമല്ല: താരീഖ് അൻവർ
