ഷിംല: ഹിമാചൽ പ്രദേശിൽ തുടരുന്ന കനത്ത മഴയ്‌ക്ക് പിന്നാലെ ഷിംലയിലെ ബദാലിന് സമീപം ദേശീയപാത 5ൽ ശക്‌തമായ മണ്ണിടിച്ചിലിനെ തുടർന്ന് വാഹന ഗതാഗതം പൂർണമായും സ്‌തംഭിച്ചു. പഴങ്ങൾ കൊണ്ടു പോകുന്ന ട്രക്കുകൾ ഉൾപ്പെടെ നിരവധി വലിയ വാഹനങ്ങൾ റോഡിൽ കുടുങ്ങി കിടക്കുകയാണ്.
അവശ്യ സർവീസുകൾ ഉൾപ്പെടെ മേഖലയിൽ മുടങ്ങിയ സാഹചര്യമാണുള്ളത്. എത്രയും വേഗത്തിൽ ഗതാഗതം പുനഃസ്‌ഥാപിക്കാൻ ശ്രമിക്കുന്നുണ്ടെന്ന് അധികൃതർ പറഞ്ഞു. കുളു ജില്ലയിലെ ഒരു ദേശീയപാതയിലും ഞായറാഴ്‌ച കനത്ത മഴ കാരണം ഗതാഗതം തടസപ്പെട്ടിരിക്കുകയാണ്.
കുളു ജില്ലയിലെ ഷോജയിൽ ദേശീയപാത 305ലാണ് മണ്ണിടിച്ചിലിനെ തുടർന്ന് വാഹന ഗതാഗതം മുടങ്ങിയത്. കനത്ത മഴയെ തുടർന്ന് സംസ്‌ഥാനത്ത്‌ യെല്ലോ അലർട് പ്രഖ്യാപിച്ചിട്ടുണ്ട്. കൻഗ്ര, ഹമിർപൂർ, സോളൻ, ഷിംല, ബിലാസ്‌പൂർ, ഉന, സിർമൗർ തുടങ്ങിയ ജില്ലകളിൽ കനത്ത മഴ ലഭിക്കുമെന്നാണ് കാലാവസ്‌ഥാ വകുപ്പ് അറിയിച്ചിരിക്കുന്നത്.
Read Also: രണ്ട് സമുദായങ്ങളെ തമ്മിലടിപ്പിക്കാൻ സംഘ്പരിവാർ ശ്രമിക്കുന്നു; കെ മുരളീധരൻ
