മുംബൈ: കർഷക സമരത്തിൽ കേന്ദ്ര സർക്കാറിനെ പിന്തുണച്ച് കായിക-സിനിമാ താരങ്ങൾ ഉൾപ്പെടെ സെലിബ്രിറ്റികൾ ട്വീറ്റ് ചെയ്തതിൽ മഹാരാഷ്ട്ര സര്ക്കാര് അന്വേഷണം പ്രഖ്യാപിച്ചതിനെ വിമര്ശിച്ച് മഹാരാഷ്ട്ര മുന് മുഖ്യമന്ത്രിയും ബിജെപി നേതാവുമായ ദേവേന്ദ്ര ഫഡ്നാവിസ്. ഭാരത് രത്ന ജേതാക്കള്ക്കെതിരെ അന്വേഷണം നടത്താൻ മഹാരാഷ്ട്ര സര്ക്കാരിന് ബോധം നഷ്ടമായോ എന്നാണ് ഫഡ്നാവിസ് ചോദിച്ചത്.
‘മഹാരാഷ്ട്ര സര്ക്കാരിന് ബോധമില്ലേ? ഭാരത് രത്ന ജേതാക്കള്ക്കെതിരെ അന്വേഷണം നടത്തുന്നതിൽ അൽപം പോലും നാണമില്ല? ശരിക്കും അന്വേഷണമല്ല ഇപ്പോള് വേണ്ടത്. അന്വേഷണത്തിന് ഉത്തരവിട്ടവരുടെ മാനസിക നില ശരിയാണോ എന്ന് പരിശോധിക്കുകയാണ് ചെയ്യേണ്ടത്. നിങ്ങളുടെ മറാത്തി ധര്മ്മവും അഭിമാനവും എവിടെപോയി? രാജ്യത്തിനുവേണ്ടി ശബ്ദമുയര്ത്തിയ ഭാരത് രത്ന ജേതാക്കള്ക്കെതിരെ അന്വേഷണം നടത്താന് ഉത്തരവിടുന്ന ഇത്തരം ആള്ക്കാര് വളരെ അപൂര്വ്വമാണ്’, ഫഡ്നാവിസ് പറഞ്ഞു.
കർഷക സമര ബന്ധപ്പെട്ട കേന്ദ്ര നിലപാടിനെതിരെ അന്താരാഷ്ട്ര തലത്തിൽ ചർച്ച ഉയർന്ന സാഹചര്യത്തിൽ കേന്ദ്ര സർക്കാറിനെ പിന്തുണച്ച് കായിക-സിനിമ താരങ്ങൾ ഉൾപ്പെടെ സെലിബ്രിറ്റികൾ ട്വീറ്റ് ചെയ്തതിലാണ് മഹാരാഷ്ട്ര സർക്കാർ അന്വേഷണം പ്രഖ്യാപിച്ചത്. കേന്ദ്രത്തെ പിന്തുണച്ചുള്ള നിലപാട് സ്വീകരിക്കാൻ താരങ്ങൾക്ക് മേൽ സമ്മർദമുണ്ടായിരുന്നോ എന്ന കാര്യമാണ് അന്വേഷിക്കുക.
Disgusting & highly deplorable❗️
Where is your Marathi Pride now❓
Where is your Maharashtra Dharma❓
We will never find such ‘ratnas’ (gems) in entire Nation who order probe against BharatRatnas who always stand strong in one voice for our Nation ❗️ https://t.co/OGPiUDMO5x— Devendra Fadnavis (@Dev_Fadnavis) February 8, 2021
100 മില്യൺ ഫോളോവേഴ്സ് ഉള്ള പോപ്പ് ഗായിക റിഹാന്നയുടെ ട്വീറ്റിലൂടെയാണ് രാജ്യത്തെ കർഷക സമരം അന്താരാഷ്ട്ര തലത്തിൽ ചർച്ചയായത്. ഇതിന് പിന്നാലെ ഇന്ത്യയുടെ കാര്യത്തില് പുറമെ നിന്നുള്ള ആളുകള് ഇടപെടേണ്ടതില്ലെന്ന് പറഞ്ഞ് കേന്ദ്രസര്ക്കാറും സച്ചിന് തെന്ഡുല്ക്കര് ഉള്പ്പെടെ ഒരു സംഘം ആളുകളും രംഗത്തുവന്നിരുന്നു. ഇന്ത്യക്കെതിരെ ഗൂഢാലോചനയുണ്ട് എന്നായിരുന്നു സർക്കാർ വാദം. ഇത് ഏറ്റുപിടിച്ചാണ് സെലിബ്രിറ്റികൾ ട്വീറ്റ് ചെയ്തത്. #IndiaAgainstPropaganda, #IndiaTogether എന്നീ ടാഗുകൾ ട്വീറ്റിൽ ഉപയോഗിച്ചിരുന്നു.
സച്ചിന് തെന്ഡുല്ക്കര്, വിരാട് കോഹ്ലി, ലതാ മങ്കേഷ്കർ, അക്ഷയ് കുമാർ, സൈന നേവാൾ, സുനിൽ ഷെട്ടി തുടങ്ങി നിരവധി താരങ്ങളാണ് കേന്ദ്രത്തെ പിന്തുണച്ച് രംഗത്ത് വന്നത്. പലരുടെയും ട്വീറ്റുകളിലെ സാമ്യതയും സമാന പദപ്രയോഗങ്ങളും ചൂണ്ടിക്കാട്ടി സമൂഹ മാദ്ധ്യമങ്ങൾ നേരത്തെ തന്നെ സംശയം മുന്നയിച്ചിരുന്നു. സംസ്ഥാന ഇന്റലിജൻസ് ഇക്കാര്യത്തിൽ അന്വേഷണം നടത്തുമെന്ന് മഹാരാഷ്ട്രാ ആഭ്യന്തരമന്ത്രി അനിൽ ദേശ്മുഖ് പറഞ്ഞിരുന്നു. ഇക്കാര്യത്തിലാണ് എതിർപ്പുമായി മുൻ മഹാരാഷ്ട്രാ മുഖ്യമന്ത്രി രംഗത്തെത്തിയത്.
Read also: ഉത്തരാഖണ്ഡ് രക്ഷാ പ്രവർത്തനം; മണ്ണും ചെളിയും തടസം, 19 മൃതദേഹങ്ങൾ കണ്ടെടുത്തു