പാരിസ് സെന്റ് ജർമനിൽ സൂപ്പർ താരം ലയണൽ മെസിയുടെ അരങ്ങേറ്റം ഇന്ന്. മെസിയും നെയ്മറും എംബപ്പേയും റെയിംസിനെതിരായ മൽസരത്തിന്റെ ആദ്യ ഇലവനിൽ ഉൾപ്പെടുമെന്നാണ് സൂചന. മൂവരും സ്ക്വാഡിൽ ഇടം നേടിയിട്ടുണ്ട്. ഇന്ന് ഇന്ത്യൻ സമയം അർധരാത്രി 12.15നാണ് മൽസരം.
രണ്ടാഴ്ചക്ക് മുൻപാണ് മെസി പിഎസ്ജിയിൽ എത്തിയതെങ്കിലും മാച്ച് ഫിറ്റ് അല്ലാത്തതിനാൽ ഇതുവരെ കളത്തിൽ ഇറങ്ങിയിരുന്നില്ല. താരം ഇന്ന് കളിക്കുകയാണെങ്കിൽ ബാഴ്സലോണയല്ലാത്ത ഒരു ക്ളബ്ബിന് വേണ്ടി മെസി ബൂട്ടണിയുന്ന ആദ്യ മൽസരമാകും ഇത്. ഇതുവരെ ലീഗിൽ കളിച്ച മൂന്ന് മൽസരങ്ങളിലും വിജയം നേടിയാണ് പിഎസ്ജി മടങ്ങിയത്.
പിഎസ്ജിയുമായി രണ്ട് വർഷത്തേക്കാണ് മെസിയുടെ കരാർ. പ്രതിവർഷം 35 ദശലക്ഷം യൂറോയാണ് പ്രതിഫലം. മെസി 2023വരെയുള്ള പ്രാഥമിക കരാർ പിഎസ്ജിയുമായി ഒപ്പുവെച്ചു. അതിനു ശേഷം ഒരു വർഷത്തേക്ക് കൂടെ കരാർ നീട്ടാനുള്ള വ്യവസ്ഥയുമുണ്ട്. നെയ്മറിന്റെ സാന്നിധ്യമാണ് പിഎസ്ജിയിലേക്കുള്ള മെസിയുടെ യാത്ര സുഗമമാകാൻ കാരണം. 30ആം നമ്പർ ജേഴ്സിയാണ് മെസി ഫ്രഞ്ച് ക്ളബ്ബിൽ അണിയുക. 10ആം നമ്പർ ജേഴ്സി വാഗ്ദാനം ചെയ്തിരുന്നെങ്കിലും അത് നിരസിച്ച മെസി 30ആം നമ്പർ തിരഞ്ഞെടുക്കുകയായിരുന്നു.
Also Read: കോവിഡ് വന്ന് പോയവരിൽ കോവാക്സിന്റെ ഒറ്റ ഡോസ് ഫലപ്രദമെന്ന് പഠനം