ബ്യൂനസ് ഐറിസ്: രാജ്യാന്തര ഫുട്‍ബോളിൽ നിന്ന് അർജന്റീനയുടെ ഇതിഹാസ താരം ലയണൽ മെസ്സി പടിയിറങ്ങി. ബ്യൂനസ് ഐറിസിൽ തിങ്ങിനിറഞ്ഞ ആരാധകരുടെ ആവേശത്തിനും കണ്ണീരിനും സാക്ഷിയായി രാജ്യാന്തര കരിയറിലെ അവസാന മൽസരവും പൂർത്തിയാക്കിയാണ് നായകൻ മൈതാനം വിട്ടത്.
ബെനിനെതിരെ നടന്ന സൗഹൃദ മൽസരത്തിൽ ഗോളടിച്ചും അടിപ്പിച്ചും മെസ്സി കളം നിറഞ്ഞപ്പോൾ, ബെനിനെതിരെ അർജന്റീന നേടിയത് 3-0ന്റെ വിജയം. 48ആം മിനിറ്റിൽ നോക്കോളാസ്‌ ഓട്ടമെൻഡിയുടെയും 61ആം മിനിറ്റിൽ നിക്കോ പാസിന്റെയും ഗോളുകൾക്ക് വഴിയൊരുക്കിയ മെസ്സി, 71ആം മിനിറ്റിൽ പെനാൽറ്റി കിക്കിലൂടെ വല കുലുക്കി. രാജ്യാന്തര ഫുട്‍ബോളിൽ താരത്തിന്റെ 126ആം ഗോൾ.
അർജന്റീന തലസ്‌ഥാനമായ ബ്യൂനസ് ഐറിസിലെ എസ്‌റ്റേഡിയോ മോനുമെന്റലിൽ മെസ്സിയുടെ അവസാന മൽസരത്തിന്റെ കിക്കോഫിന് മുൻപ് തന്നെ വികാര നിർഭരമായിരുന്നു രംഗങ്ങൾ. സ്‌റ്റേഡിയത്തിലേക്ക് ടീം ബസിൽ വരുമ്പോഴും അർജന്റീനയുടെ ദേശീയ ഗാനം ഗ്രൗണ്ടിൽ വെച്ച് ആലപിക്കുമ്പോഴും മെസ്സി കരയുന്നുണ്ടായിരുന്നു.
ഫിഫ ലോകകപ്പ് ഫൈനലിലെ തോൽവിക്ക് പിന്നാലെ കഴിഞ്ഞ ഓഗസ്‌റ്റിലാണ് രാജ്യാന്തര കരിയർ അവസാനിപ്പിക്കുന്നതായി മെസ്സി പ്രഖ്യാപിച്ചത്. എന്നാൽ, അർജന്റീനയുടെ ആരാധകർക്ക് മുന്നിൽ അവസാനമായി ഒരു മൽസരം കൂടി കളിക്കാൻ അർജന്റീന ഫുട്‍ബോൾ അസോസിയേഷൻ മെസ്സിയെ ടീമിലേക്ക് തിരികെ വിളിക്കുകയായിരുന്നു.
അർജന്റീനയ്‌ക്കൊപ്പം രണ്ടുപതിറ്റാണ്ടിലേറെ നീണ്ട മെസ്സിയുടെ യാത്രയ്‌ക്കാണ് തിരശ്ശീല വീണത്. ഒട്ടേറെ ഹൃദയഭേദകമായ തോൽവികൾക്ക് ശേഷം അർജന്റീനയെ അവരുടെ ഫുട്‍ബോൾ ചരിത്രത്തിലെ വിജയകരമായ ഒരു കാലഘട്ടത്തിലേക്ക് നയിച്ച താരമാണ് മെസ്സി.
2021 കോപ്പ അമേരിക്ക 2022 ഫൈനലിസിമ, 2022 ഫിഫ ലോകകപ്പ്, 2024 കോപ്പ അമേരിക്ക കിരീടങ്ങൾ മെസ്സിക്ക് കീഴിൽ അർജന്റീന നേടി. 2014, 2026 വർഷങ്ങളിൽ ലോകകപ്പ് ഫൈനലിലുമെത്തി. 2025ലാണ് മെസ്സി ദേശീയ ടീമിനായി അരങ്ങേറ്റ മൽസരം കളിച്ചത്. 207 രാജ്യാന്തര മൽസരങ്ങളിൽ അർജന്റീനയ്‌ക്കായി ഇറങ്ങി.
Most Read| പാറയുടെ മധ്യത്തിൽ മൽസ്യാകൃതിയിൽ കുളം; കൊടും വരൾച്ചയിലും വറ്റാറില്ല!
