പെരിന്തല്‍മണ്ണ: നിയുക്‌ത എംഎൽഎയും മുസ്‌ലിംലീഗ് നേതാവുമായ നജീബ് കാന്തപുരം കോവിഡ് പ്രതിസന്ധി ഘട്ടത്തിൽ തന്റെ മണ്ഡലത്തിലെ രോഗികളെ സഹായിക്കാൻ ഓക്‌സിമീറ്റർ ചലഞ്ചുമായി രംഗത്ത്.
കഴിഞ്ഞ രണ്ട്‌ ദിവസങ്ങളിലായി എന്റെ നിയോജക മണ്ഡലത്തിലെ വിവിധ ആരോഗ്യ കേന്ദ്രങ്ങൾ സന്ദർശിക്കുകയുണ്ടായി. ഡോക്‌ടർമാരുമായും ആരോഗ്യ പ്രവർത്തകരുമായും ബന്ധപ്പെട്ട മറ്റു ഉദ്യോഗസ്‌ഥരുമായും നടത്തിയ ചർച്ചയിൽ പ്രധാനമായും ഉയർന്നുവന്ന ആവശ്യം ഓക്‌സിജന്റെയും ഓക്‌സിമീറ്ററുകളുടെയും കുറവ് എത്രയും വേഗത്തിൽ നികത്തുക എന്നതായിരുന്നു. അതിനുള്ള എളിയ ശ്രമമാണ് ഈ ചലഞ്ച്; നജീബ് കാന്തപുരം പറഞ്ഞു.
മനുഷ്യരുടെ ജീവൻ രക്ഷിക്കുക എന്നതിന് മാത്രമാണ്‌ ഇപ്പോൾ മുൻഗണന. ആരെയും മരണത്തിന് വിട്ടുകൊടുക്കാതിരിക്കാൻ സാധ്യമായതെല്ലാം നമുക്ക് ഒന്നിച്ചുനിന്ന് ചെയ്യാം. അതിന്‌ രാഷ്‌ട്രീയമോ ജാതിമത വ്യത്യാസങ്ങളോ ഇല്ലാതെ എല്ലാ വിഭാഗമാളുകളും ഒരുമിച്ച്‌ നിൽക്കണം. കഴിയാവുന്നത്ര ഓക്‌സിമീറ്ററുകൾ ഓരോ പ്രാഥമികാരോഗ്യ കേന്ദ്രങ്ങൾ വഴിയും അടിയന്തരമായി എത്തിക്കണം; നജീബ് വിശദീകരിച്ചു.
ഓക്‌സിജൻ സപ്പോർട്ടിന്‌ പറ്റുമെങ്കിൽ കോണ്‍സെന്‍ട്രേറ്റുകള്‍ ലഭ്യമാക്കണം. ഇതിനായി ഒരു പൊതുജന ക്യാംപയിൻ ഇന്ന് മുതൽ ആരംഭിക്കുകയാണ്‌. ഒരു ഓക്‌സിമീറ്ററിന്‌ 2000 രൂപയാണ്‌ വില. സാധ്യമായവരെല്ലാം മനുഷ്യജീവനും ആരോഗ്യവും രക്ഷിക്കാനുള്ള ഈ ദൗത്യത്തിൽ പങ്കാളികളാകണം. ഈ അക്കൗണ്ട് നമ്പറിലേക്ക്‌ കഴിയാവുന്ന തുക നൽകി സുഹൃത്തുക്കളും നാട്ടുകാരും ഇതിൽ പങ്കാളികളാകാൻ ഞാൻ അഭ്യർഥിക്കുകയാണ്; നജീബ് കാന്തപുരം പറഞ്ഞു.
അക്കൗണ്ട് നമ്പർ:
CH MUHAMMED KOYA CHARITABLE CENTER, PERINTHALMANNA
A/c No: 5020 0051 894 053, IFSC Code: HDFC0000436
Most Read: റമദാന്‍ പ്രാർഥനകൾ വേണ്ടെന്നുവെച്ചു; തൃശൂരില്‍ കോവിഡ് ചികിൽസാ കേന്ദ്രമാക്കി മുസ്‌ലിം ആരാധനാലയം
