മലപ്പുറം: കഴിഞ്ഞ കാലങ്ങളില് ഏഴ് സര്വീസുകള് നടത്തിയിരുന്ന നിലമ്പൂര്-ഷൊര്ണൂര് പാതയില് കോവിഡിനെ തുടര്ന്ന് നിറുത്തിവെച്ച എല്ലാ സര്വീസുകളും പുനരാരംഭിക്കാന് നടപടി സ്വീകരിക്കണമെന്ന് ആവശ്യപ്പെട്ട് എസ്വൈഎസ് മലപ്പുറം ഈസ്റ്റ് ജില്ലാകമ്മിറ്റി സതേണ് റെയില്വേ ഡിവിഷണല് മാനേജര്ക്ക് നിവേദനം നൽകി.
‘നിലമ്പൂര്-ഷൊര്ണൂര് പാതയില് പകല് സമയത്ത് വണ്ടികള് ഇല്ലാത്തത് മൂലം ജനങ്ങള് വലിയ ദുരിതത്തിലാണ്. വിദ്യാർഥികൾ, സര്ക്കാര്-സ്വകാര്യ സ്ഥാപനങ്ങളിലെ ജീവനക്കാര് തുടങ്ങി ആയിരക്കണക്കിന് ആളുകളാണ് മറ്റു യാത്ര മാര്ഗങ്ങള് ആശ്രയിക്കേണ്ടി വരുന്നത്. ഈ റെയില്വേ റൂട്ടിനോട് അധികൃതർ കാണിക്കുന്ന അനാസ്ഥ അവസാനിപ്പിച്ച് എത്രയും വേഗത്തിൽ പൊതുസമൂഹത്തിന്റെ യാത്രാ ദുരിതത്തിന് പരിഹാരം കാണണം.‘ എസ്വൈഎസ് നിവേദനത്തിൽ ആവശ്യപ്പെട്ടു.
കോട്ടയം-നിലമ്പൂര് എക്സ്പ്രസ് സര്വീസ് പുനരാരംഭിക്കുക, നിലമ്പൂര്-ഷൊര്ണൂര് പാതയില് ചരക്കു ഗതാഗതം ആരംഭിക്കുക, നിലമ്പൂരില് നിന്ന് കോയമ്പത്തൂരിലേക്ക് നേരിട്ട് സര്വീസ് ആരംഭിക്കുക, പാത പൂര്ണമായും വൈദ്യുതീകരിക്കുക, നിലമ്പൂര്-കൊച്ചുവേളി വരെയുള്ള രാജറാണിയുടെ സര്വീസ് തിരുവന്തപുരം-നാഗര്കോവില് വരെ നീട്ടുക, റെയില്വേയുടെ വിസ്റ്റാര്ഡം ടൂറിസ്റ്റ് കോച്ച് നിലമ്പൂരിലേക്കും അനുവദിക്കുക എന്നീ ആവശ്യങ്ങളും നിവേദനത്തില് എസ്വൈഎസ് ഉന്നയിച്ചിട്ടുണ്ട്.
Most Read: മധ്യപ്രദേശിൽ ക്രൈസ്തവ ദേവാലയങ്ങള് തകര്ക്കും; വിഎച്ച്പി ഭീഷണി