കണ്ണൂര്: കമ്യൂണിസ്റ്റുകാര് ഒരിക്കലും വിശ്വാസികൾക്ക് എതിരല്ലെന്ന് സിപിഐഎം കണ്ണൂര് ജില്ലാ സെക്രട്ടറി എംവി ജയരാജന്. വിശ്വാസികളെ ഒരിക്കലും ശത്രുക്കളായി കാണാറില്ല, എല്ലാവരും കമ്മ്യൂണിസ്റ്റുകാരുടെ മിത്രങ്ങളാണെന്നും വിശ്വാസങ്ങള്ക്ക് പാര്ട്ടി തടസം നില്ക്കാറില്ലെന്നും എംവി ജയരാജന് പറഞ്ഞു. മാതൃഭൂമി ന്യൂസിനോടായിരുന്നു അദ്ദേഹത്തിന്റെ പ്രതികരണം.
വിശ്വാസികളെല്ലാം കമ്മ്യൂണിസ്റ്റുകാരുടെ മിത്രങ്ങളാണ്. വിശ്വാസങ്ങള്ക്ക് പാര്ട്ടി തടസം നില്ക്കാറില്ല. കമ്മ്യൂണിസ്റ്റുകാര് സ്വീകരിക്കുന്നൊരു സമീപനമാണിത്. അസുഖം ബാധിച്ച് അബോധാവസ്ഥയിൽ ആയിരുന്ന സമയത്ത് വിശ്വാസികളായ ചിലര് ക്ഷേത്രത്തിലും പള്ളിയിലും അവരുടെ വിശ്വാസ പ്രകാരമുള്ള ചടങ്ങ് നടത്തി. അത് അറിയിച്ചവര് ധാരാളമാണ്. ഞങ്ങള് പ്രാർഥിച്ചിട്ടുണ്ടെന്നും ചടങ്ങുകള് നടത്തിയിട്ടുണ്ടെന്നും അറിയിച്ച് നിരവധി പേര് വിളിച്ചിരുന്നു; ജയരാജൻ പറഞ്ഞു.
തിരഞ്ഞെടുപ്പ് എന്ന് പറയുന്നത് കമ്യൂണിസ്റ്റുകാരെ സംബന്ധിച്ചിടത്തോളം ജനങ്ങളുമായി കൂടുതല് ബന്ധപ്പെടാനും അടുക്കാനുമുള്ള അവസരങ്ങളായാണ് കാണുന്നതെന്നും അദ്ദേഹം വ്യക്തമാക്കി.
Read also: ഭക്ഷ്യക്കിറ്റും, പെൻഷനും വോട്ടിന് വേണ്ടിയല്ല, ജനങ്ങൾക്ക് വേണ്ടി; മുഖ്യമന്ത്രി