ന്യൂഡെല്ഹി: കര്ഷകരുടെ രക്തം കയ്യില് പുരളാന് തങ്ങള് ആഗ്രഹിക്കുന്നില്ലെന്ന് സുപ്രീം കോടതി. കാര്ഷിക നിയമത്തില് കേന്ദ്രസര്ക്കാരിനെതിരെ അതിരൂക്ഷ വിമര്ശനമാണ് സുപ്രീംകോടതിയുടെ ഭാഗത്ത് നിന്നും ഉണ്ടായത്. ഇന്ത്യയിലെ സുപ്രീംകോടതിയായ തങ്ങള്ക്ക് വിഷയത്തില് തീരുമാനമെടുക്കാന് അറിയാമെന്നും രക്തച്ചൊരിച്ചല് ഒഴിവാക്കാന് ഉത്തരവാദിത്തമുണ്ടെന്നും കോടതി പറഞ്ഞു.
പല സംസ്ഥാനങ്ങളും എതിര്ക്കുന്ന ഭേഗദതിയില് എന്ത് കൂടിയാലോചന നടന്നുവെന്നും കോടതി സര്ക്കാരിനോട് ചോദിച്ചു. സമരം തുടരാന് കര്ഷകര്ക്ക് അവകാശമുണ്ടെന്നു തന്നെയാണ് കോടതി പറഞ്ഞത്. സുപ്രീംകോടതി ഇടപെട്ട് സമരം അവസാനിപ്പിച്ചെന്ന് പറയാന് ആഗ്രഹിക്കുന്നില്ലെന്നും എന്നാല് ഇപ്പോഴത്തെ സമരവേദി മാറ്റാന് നിങ്ങള്ക്ക് കഴിയില്ലേയെന്ന് കോടതി കര്ഷകരോട് ചോദിച്ചു.
അതേസമയം കര്ഷകര് ചര്ച്ച തുടരാമെന്ന് അറിയിച്ചിട്ടുണ്ടെന്ന് അറ്റോര്ണി ജനറല് കോടതിയെ അറിയിച്ചു. കാര്ഷിക നിയമഭേദഗതിക്കായി നടപടികള് തുടങ്ങിയത് മുന്സര്ക്കാരാണെന്നാണ് കോടതിയില് കേന്ദ്രം വ്യക്തമാക്കിയത്. എന്നാല് കേന്ദ്രത്തിന്റെ ആ വാദത്തിനെതിരെയും സുപ്രീംകോടതി രൂക്ഷ വിമര്ശനം ഉന്നയിച്ചു.
കാര്ഷിക നിയമങ്ങള് തല്ക്കാലം നടപ്പാക്കരുതെന്നാണ് കോടതി കേന്ദ്രത്തോട് ആവശ്യപ്പെട്ടിരിക്കുന്നത്. ഇതുവരെ കേന്ദ്രസര്ക്കാര് കര്ഷക സംഘടനകളുമായി നടത്തിയ ചര്ച്ചകള് ഒന്നും തന്നെ ഫലം കാണാത്ത സാഹചര്യത്തില് പ്രശ്ന പരിഹാരത്തിനായി വിദഗ്ധ സമിതി രൂപീകരിക്കാമെന്ന നിര്ദേശവും സുപ്രീംകോടതി മുന്നോട്ട് വച്ചിട്ടുണ്ട്.
Read also: കേന്ദ്രത്തിനെതിരെ രൂക്ഷ വിമര്ശനം; കാര്ഷിക നിയമം തല്ക്കാലം നടപ്പാക്കരുതെന്ന് സുപ്രീംകോടതി