തിരുവനന്തപുരം : കേരളപ്പിറവി ദിനത്തില്‍ ആയിരം പേര്‍ക്ക് ശ്രവണ സഹായി നല്‍കുന്ന ശ്രവണ്‍ പദ്ധതി ആരോഗ്യവകുപ്പ് മന്ത്രി കെ കെ ശൈലജ ഉല്‍ഘാടനം ചെയ്യും. കേള്‍വി ശക്‌തി ഇല്ലാത്ത ആയിരം പേര്‍ക്ക് ഇയര്‍മോള്‍ഡോഡ് കൂടിയ ഡിജിറ്റല്‍ ശ്രവണ സഹായികളുടെ വിതരണം നവംബര്‍ ഒന്നാം തീയതി നടക്കുമെന്ന് അധികൃതർ വ്യക്തമാക്കി. വികലാംഗ ക്ഷേമ കോര്‍പ്പറേഷന്‍ നടത്തുന്ന ശ്രവണ്‍ പദ്ധതി നവംബര്‍ ഒന്നാം തീയതി രാവിലെ 11.45 ന് ഓണ്‍ലൈന്‍ വഴി ആരോഗ്യമന്ത്രി ഉല്‍ഘാടനം ചെയ്യും.
ശ്രവണ സഹായികള്‍ക്കായി നിരവധി അപേക്ഷകളാണ് ഇതുവരെ ലഭിച്ചത്. അതിനാലാണ് അടിയന്തിരമായി ആയിരം ശ്രവണ സഹായികള്‍ നല്‍കാന്‍ തീരുമാനിച്ചത്. ഒന്നാം തീയതി നടക്കുന്ന ഉല്‍ഘാടന ചടങ്ങുകള്‍ക്ക് ശേഷം വിവിധ ജില്ലകളില്‍ സംഘടിപ്പിക്കുന്ന ക്യാമ്പുകളിലൂടെ ശ്രവണ സഹായികള്‍ അര്‍ഹതപ്പെട്ട ആളുകള്‍ക്ക് വിതരണം ചെയ്യുമെന്ന് മന്ത്രി വ്യക്തമാക്കി.
ഭിന്നശേഷിക്കാരായ ആളുകളുടെ സഞ്ചാര സ്വാതന്ത്ര്യവും ആശയ വിനിമയ സ്വാതന്ത്ര്യവും സംരക്ഷിക്കുന്നതിനായി സംസ്‌ഥാനത്ത് വികലാംഗ ക്ഷേമ കോര്‍പ്പറേഷന്‍ സൗജന്യമായി നൂതന ഉപകരണങ്ങള്‍ വിതരണം ചെയ്യുന്ന പരിപാടികള്‍ നടന്നു വരികയാണ്. പദ്ധതിയുടെ ഭാഗമായി 1500 ഓളം വരുന്ന ചലന പരിമിതി അനുഭവിക്കുന്ന ആളുകള്‍ക്ക് മുച്ചക്ര വാഹനങ്ങളും, ആയിരം കാഴ്‌ച ശക്‌തി ഇല്ലാത്ത ആളുകള്‍ക്ക് സ്‌മാര്‍ട്ട് ഫോണും ഇതുവരെ നല്‍കിയിട്ടുണ്ട്.
Read also : നബിദിനത്തിൽ 1001 ഫലവൃക്ഷ തൈകളുമായി പാപ്പിനിപ്പാറ ‘കെംസ്’
