ബെയ്‌ജിംഗ്: ചൈനയിൽ വീണ്ടും കോവിഡ് ഭീഷണി ഉയരുന്നു. ഇന്ന് മാത്രം രാജ്യത്ത് 75 പുതിയ കോവിഡ് കേസുകളാണ് റിപ്പോർട് ചെയ്‌തത്‌. ഇതിൽ 53 കേസുകളും പ്രാദേശിക തലത്തിൽ സമ്പർക്കത്തിലൂടെ ഉണ്ടായതാണ്. ഒരു കിഴക്കൻ മേഖലയിലെ നാൻജിംഗ് വിമാനത്താവളവുമായി ബന്ധപ്പെട്ട കോവിഡ് ക്ളസ്‌റ്റർ ഇപ്പോൾ 27 നഗരങ്ങളിലേക്കും 18 പ്രവിശ്യകളിലേക്കും വ്യാപിച്ചതായാണ് റിപ്പോർട്ടുകൾ.
ഡെൽറ്റ വകഭേദമാണ് ഇവിടെ കൂടുതലായും കണ്ടുവരുന്നത്. കഴിഞ്ഞ വർഷം രാജ്യത്തിലെ കോവിഡ് വ്യാപനം വലിയ തോതിൽ ഉയരാതെ പിടിച്ചു നിർത്തുന്നതിൽ രാജ്യം വിജയിച്ചിരുന്നു.
എന്നാൽ മാസങ്ങൾക്ക് ശേഷം വീണ്ടും രാജ്യത്ത് കോവിഡ് ബാധ ഉയരുന്നത് ആശങ്കയ്‌ക്ക്‌ ഇടയാക്കുന്നുണ്ട്. വിവിധ നഗരങ്ങളിൽ രോഗബാധ കണ്ടെത്താനായി കൂട്ട പരിശോധനകൾ നടക്കുന്നുണ്ട്. കടുത്ത നിയന്ത്രണങ്ങളും ഏർപ്പെടുത്തിയിട്ടുണ്ട്.
വെള്ളിയാഴ്‌ച വരെ 1.6 ബില്യണിലധികം വാക്‌സിൻ ഡോസുകൾ രാജ്യ വ്യാപകമായി വിതരണം ചെയ്‌തിട്ടുണ്ടെന്ന് നാഷണൽ ഹെൽത്ത് കമ്മീഷൻ (എൻഎച്ച്‌സി) അറിയിച്ചു. എത്ര പേർക്ക് രണ്ട് ഡോസ് വാക്‌സിനും നൽകിയെന്നതിന്റെ കണക്കുകൾ ഇതുവരെയും പുറത്തു വിട്ടിട്ടില്ല.
Read Also: രാജ്യത്തെ കോവിഡ് വാക്‌സിനേഷൻ ഈ മാസം വർധിപ്പിക്കും: ആരോഗ്യമന്ത്രി
