ന്യൂഡെൽഹി: മുകളിലത്തെ നിലയിൽ നിന്നും രണ്ടാം ക്‌ളാസ് വിദ്യാർഥിയെ കാലിൽ പിടിച്ച് തലകീഴായി തൂക്കിയിട്ട സംഭവത്തിൽ പ്രിൻസിപ്പൽ അറസ്‌റ്റിൽ. ഉത്തർപ്രദേശിലെ മിർസാപൂരിലുള്ള സ്‌കൂളിലാണ് സംഭവം നടന്നത്. രണ്ടാം ക്‌ളാസ് വിദ്യാർഥിയായ സോനു യാദവ് സഹപാഠിയെ കടിച്ചതിനെ തുടർന്നാണ് പ്രിൻസിപ്പൽ തലകീഴായി തൂക്കിയിട്ടത്.
സംഭവത്തിൽ സ്‌കൂൾ പ്രിൻസിപ്പൽ മനോജ് വിശ്വകർമ്മയാണ് അറസ്‌റ്റിലായത്‌. ക്ഷമാപണം നടത്തിയില്ലെങ്കിൽ കൈവിടുമെന്ന് ഭീഷണിപ്പെടുത്തിയാണ് ഇയാൾ വിദ്യാർഥിയെ തലകീഴായി തൂക്കിയിട്ടത്. തുടർന്ന് സോനുവിന്റെ കരച്ചിലും ബഹളവും കേട്ട് വിദ്യാർഥികൾ ഓടിക്കൂടുകയായിരുന്നു.
വിദ്യാർഥികൾ കൂടിയതോടെയാണ് മനോജ് കുട്ടിയെ താഴെയിറക്കിയത്. ജുവനൈൽ ജസ്‌റ്റിസ്‌ ആക്‌ട് പ്രകാരമാണ് സംഭവത്തിൽ മനോജിനെതിരെ കേസ് രജിസ്‌റ്റർ ചെയ്‌ത്‌ അറസ്‌റ്റ് രേഖപ്പെടുത്തിയത്.
Read also: ഷോറൂമിൽ നിന്ന് ഇറക്കുന്നതിനിടെ നിയന്ത്രണം വിട്ടു; കാർ കടയിലേക്ക് ഇടിച്ചു കയറി
