തിരുവനന്തപുരം: ജില്ലയിൽ നിരോധനാജ്‌ഞ പ്രഖ്യാപിച്ച സാഹചര്യത്തിലും വെഞ്ഞാറമൂട്ടിൽ എംഎൽഎ അടക്കമുള്ളവർ പങ്കെടുത്ത പരിപാടിയിൽ വൻ ആൾക്കൂട്ടം. മുഖ്യമന്ത്രി ഓൺലൈൻ ആയി ഉൽഘാടനം നിർവഹിച്ച പരിപാടിയിലാണ് നിരോധനാജ്‌ഞ ലംഘിച്ചത്.
കോവിഡ് വ്യാപനം രൂക്ഷമായ സാഹചര്യത്തിൽ സംസ്ഥാനത്ത് പ്രഖ്യാപിച്ച നിരോധനാജ്‌ഞ ഇന്ന് മുതലാണ് നിലവിൽ വന്നത്. ആരാധനാലയങ്ങളിലും പൊതുപരിപാടികളിലും 20 ൽ കൂടുതൽ ആളുകൾ പങ്കെടുക്കരുതെന്ന് ഉത്തരവുണ്ടായിരുന്നു. വിവിധ ജില്ലകളിലെ കോവിഡ് സാഹചര്യം കണക്കിലെടുത്ത് അതാത് ജില്ലകളിലെ കളക്‌ടർമാരാണ് 144 പ്രഖ്യാപിച്ചത്. പൊതുസ്ഥലങ്ങളിൽ അഞ്ചിൽ കൂടുതൽ ആളുകൾ കൂട്ടം കൂടരുതെന്ന നിർദ്ദേശം എല്ലായിടത്തും ബാധകമാണ്.
