ശ്രീനഗര്‍: ജമ്മു കശ്‌മീരിലെ പുല്‍വാമ ജില്ലയില്‍ തിങ്കളാഴ്‌ച ഉണ്ടായ ഏറ്റുമുട്ടലില്‍ ഒരു ഹിസ്ബുള്‍ ഭീകരന്‍ കൊല്ലപ്പെട്ടു. ഒരാള്‍ കീഴടങ്ങുകയും ചെയ്‌തു. രണ്ട് പേരും ഹിസ്ബുള്‍ മുജാഹിദീനുമായി ബന്ധപ്പെട്ട് പ്രവര്‍ത്തിക്കുന്നവര്‍ ആണെന്ന് സുരക്ഷാ സേന പറയുന്നു.
പുല്‍വാമ ജില്ലയിലെ നൂര്‍പുര പ്രദേശത്ത് നടന്ന സുരക്ഷാ സേനയുടെ തിരച്ചിലില്‍ ഭീകരരെ കണ്ടെത്തുക ആയിരുന്നു. പിന്നീട് നടന്ന ഏറ്റുമുട്ടലിലാണ് ഒരാള്‍ കൊല്ലപ്പെട്ടത്.
ഇയാളുടെ പേരുവിവരങ്ങള്‍ പുറത്ത് വിട്ടിട്ടില്ല. ജമ്മു കശ്‌മീര്‍ പോലീസിന് ലഭിച്ച രഹസ്യ വിവരത്തെ തുടര്‍ന്നായിരുന്നു സംയുക്‌തമായി തിരച്ചില്‍ നടത്തിയത്.
‘തിരിച്ചറിയപ്പെടാത്ത ഒരു ഭീകരന്‍ ഏറ്റുമുട്ടലില്‍ കൊല്ലപ്പെട്ടു. മറ്റൊരാള്‍ സുരക്ഷാ സേനക്ക് മുന്‍പില്‍ കീഴടങ്ങി. ഇയാള്‍ പുല്‍വാമയിലെ ഗുല്‍ഷന്‍പുര സ്വദേശിയാണ്. സെപ്റ്റംബര്‍ 25 മുതല്‍ ഒളിവില്‍ കഴിയുക ആയിരുന്നു. ഇയാളില്‍ നിന്നും ഒരു എകെ റൈഫിള്‍ പിടിച്ചെടുത്തു.’ ആര്‍മി പുറത്തുവിട്ട പ്രസ്‌താവനയിൽ അറിയിച്ചു.
Read Also: മെഹ്ബൂബയും കുടുംബവും പാകിസ്‌ഥാനിലേക്ക് പോകണം; ഗുജറാത്ത് ഉപമുഖ്യമന്ത്രി
