ചെന്നൈ: തമിഴ്നാട് നിയമസഭാ തിരഞ്ഞെടുപ്പ് പ്രചാരണത്തിന് തുടക്കം കുറിച്ച് കോൺഗ്രസ് മുൻ അധ്യക്ഷൻ രാഹുൽ ഗാന്ധി ഇന്ന് കോയമ്പത്തൂരിൽ എത്തും. കോയമ്പത്തൂർ, തിരുപ്പൂർ ജില്ലകളിലെ പടിഞ്ഞാറൻ ജില്ലകളിൽ അദ്ദേഹം റോഡ്ഷോ നടത്തും. വ്യവസായ തൊഴിലാളികൾ, കർഷകർ, നെയ്ത്തുകാർ തുടങ്ങിയവരുമായി രാഹുൽ ഗാന്ധി ഇന്ന് സംവദിക്കുമെന്നും കോൺഗ്രസ് നേതാക്കൾ അറിയിച്ചു.
രാവിലെ 11ന് രാഹുൽ ഗാന്ധി കോയമ്പത്തൂരിലെത്തും. തുടർന്ന് അദ്ദേഹം 11.35 മുതൽ 12.35 വരെ ഒരു മണിക്കൂർ ചെറുകിട, ഇടത്തരം സംരംഭകരുമായി ആശയവിനിമയം നടത്തും. ഇതിന് ശേഷമായിരിക്കും കോയമ്പത്തൂർ, തിരുപ്പൂർ ജില്ലയിലെ റോഡ്ഷോകൾ.
തിരുപ്പൂർ, ഈറോഡ്, കരൂർ ഉൾപ്പടെ അഞ്ച് ജില്ലകളിൽ രാഹുൽ ഗാന്ധി മൂന്ന് ദിവസം പ്രചാരണം നടത്തും. ഭരണകക്ഷിയായ എഐഎഡിഎംകെയുടെ ശക്തി കേന്ദ്രമായി കണക്കാക്കപ്പെടുന്ന ജില്ലകളാണിവ എന്നതാണ് ശ്രദ്ധേയം.
ജയലളിതയും കരുണാനിധിയും അന്തരിച്ചതിനു ശേഷം നടക്കുന്ന ആദ്യ നിയമസഭാ തിരഞ്ഞെടുപ്പാണിത്. 2019ലെ ലോക്സഭാ തിരഞ്ഞെടുപ്പിൽ 39 സീറ്റുകളിൽ 38 എണ്ണവും ഡിഎംകെ- കോൺഗ്രസ് സഖ്യം നേടിയിരുന്നു. ഈ വർഷം മെയ് മാസത്തിലാണ് നിയമസഭാ തിരഞ്ഞെടുപ്പ്.
Also Read: ‘മകൻ ജയിൽ മോചിതനാകും എന്ന് തന്നെയാണ് വിശ്വാസം’; പേരറിവാളന്റെ മാതാവ്