മുംബൈ: ആർബിഐയുടെ പുതുക്കിയ വായ്പ നയം പ്രഖ്യാപിച്ചു. പലിശ നിരക്കുകളിൽ മാറ്റമില്ലാതെയാണ് പുതിയ വായ്പ നയം റിസർവ് ബാങ്ക് പുറത്തുവിട്ടത്. ആർബിഐ ഗവർണർ ശക്‌തികാന്ത ദാസാണ് പ്രഖ്യാപനം നടത്തിയത്.
റിപ്പോ നാല് ശതമാനത്തിലും റിവേഴ്‌സ് റിപ്പോ നിരക്ക് 3.35 ശതമാനത്തിലും തുടരും. മോണിറ്ററി പോളിസി കമ്മിറ്റി ഐക്യകണ്‌ഠേനയാണ് തീരുമാനം എടുത്തതെന്ന് ഗവർണർ അറിയിച്ചു. മാർജിനൽ സ്‌റ്റാൻഡിംഗ്‌ ഫെസിലിറ്റി (എംഎസ്എഫ്) നിരക്കും ബാങ്ക് റേറ്റും 4.25 ശതമാനമായി തന്നെ തുടരും.
വരും നാളുകളിൽ പണപ്പെരുപ്പം ഉയർന്ന് നിൽക്കുമെങ്കിലും ശൈത്യ കാലത്ത് കാർഷിക വിളകളുടെ നേട്ടം ആശ്വാസമാകുമെന്നും റിപ്പോർട്ടിൽ പറയുന്നു. അവസാന രണ്ട് പാദങ്ങളിൽ ജിഡിപി വളർച്ച തുടരുമെന്നാണ് റിപ്പോർട്ട് പറയുന്നത്.
ആർബിഐ പുതിയ വായ്പ നയം പ്രഖ്യാപിച്ചതിന് പിന്നാലെ ഇന്ത്യൻ ഓഹരി വിപണിയിൽ വൻ മുന്നേറ്റമാണ് ഉണ്ടായത്. സെൻസെക്‌സ് 313.55 പോയിന്റ് കൂടി 44946.20 ആയി. നിഫ്റ്റിയിൽ 0.31 ശതമാനം ഉയർച്ചയാണ് ആർബിഐ പ്രഖ്യാപനം ഉണ്ടാക്കിയത്.
Read Also: വാക്‌സിന്‍ വിതരണം ശാസ്‍ത്രജ്‌ഞരുടെ അനുമതി ലഭിച്ചാലുടന്‍; പ്രധാനമന്ത്രി
