കൊച്ചി: പത്തു രൂപയുടെ ഉച്ചഭക്ഷണം പദ്ധതിയിലേക്ക് പൊതുജന പിന്തുണ തേടി കൊച്ചി കോര്‍പറേഷന്‍. ഇതിനായി സമൃദ്ധി@കൊച്ചി എന്ന പേരില്‍ ബാങ്ക് അക്കൗണ്ട് തുടങ്ങിയതായി മേയര്‍ എം അനില്‍കുമാര്‍ അറിയിച്ചു.
മിതമായ നിരക്കില്‍ മികച്ച ഭക്ഷണം നല്‍കുന്ന ഉച്ചഭക്ഷണ പദ്ധതിക്കായി കൂടുതല്‍ പേരുടെ പിന്തുണ ലഭിക്കുമെന്നാണ് പ്രതീക്ഷയെന്നും മേയര്‍ പറഞ്ഞു.
വിശപ്പ് രഹിത കൊച്ചി എന്ന ലക്ഷ്യം നിറവേറ്റുന്നതിനായാണ് കൊച്ചി കോര്‍പറേഷന്‍ 10 രൂപയ്‌ക്ക് ഉച്ചഭക്ഷണം നല്‍കുന്ന സമൃദ്ധി@കൊച്ചി എന്ന പദ്ധതി നടപ്പിലാക്കിയത്. കോര്‍പ്പറേഷന്റെ ബജറ്റിൽ ഉള്‍പ്പെടുത്തി നടപ്പിലാക്കിയ പദ്ധതിക്ക് മികച്ച സ്വീകാര്യതയാണ് ചുരുങ്ങിയ സമയംകൊണ്ടുതന്നെ ലഭിച്ചത്.
പ്രവര്‍ത്തനം ആരംഭിച്ച് 5 ദിവസം കൊണ്ട് പതിനായിരത്തില്‍ ഏറെ ആളുകള്‍ക്ക് ജനകീയ ഹോട്ടലിലൂടെ ഉച്ചഭക്ഷണം നല്‍കാനായി. പദ്ധതി ദീര്‍ഘനാള്‍ നിലനിര്‍ത്താനുള്ള തയ്യാറെടുപ്പിലാണ് കോര്‍പറേഷന്‍.
കോര്‍പറേഷനിലെ കുടുംബശ്രീ അംഗങ്ങളാണ് ജനകീയ ഹോട്ടലിന്റെ പിന്നിൽ പ്രവര്‍ത്തിക്കുന്നത്. ഇവര്‍ക്ക് മാന്യമായ വേതനം നല്‍കുക എന്ന ലക്ഷ്യം കൂടി ഈ പദ്ധതിക്കുണ്ട്.
Most Read: മുഖ്യമന്ത്രിയുടെ ഓഫിസ് ഇടപെട്ടു; അഷ്‌ടമുടിയിലെ മാലിന്യം നീക്കി
