റിയാദ്: കോവിഡ് കേസുകളുടെ എണ്ണം വർദ്ധിച്ചുവരുന്ന സാഹചര്യത്തിൽ ഇന്ത്യയിലേക്കും തിരിച്ചുമുള്ള വിമാന സർവീസുകൾ നിർത്തിവച്ച് സൗദി അറേബ്യ. ഇനിയൊരു അറിയിപ്പ് ഉണ്ടാകുന്നതുവരെ ഇന്ത്യയിൽ നിന്ന് സൗദിയിലേക്കും തിരിച്ചുമുള്ള യാത്രാ വിമാനങ്ങൾ സർവീസ് നടത്തില്ലെന്ന് സൗദി ജനറൽ അതോറിറ്റി ഓഫ് സിവിൽ ഏവിയേഷൻ അറിയിച്ചു. വിലക്ക് താത്കാലികമാണെന്ന് സൗദി വ്യക്തമാക്കി. ഇന്ത്യയെ കൂടാതെ ബ്രസീൽ, അർജന്റീന എന്നീ രാജ്യങ്ങളുമായുള്ള സർവീസുകളും സൗദി താത്കാലികമായി നിർത്തിവെച്ചു.
കോവിഡിന്റെ പശ്ചാത്തലത്തിൽ ഏർപ്പെടുത്തിയ യാത്രാ നിരോധനം മാറി പ്രവാസികൾ സൗദിയിലേക്ക് മടങ്ങാനിരിക്കെയാണ് വീണ്ടും യാത്രാവിലക്ക് ഏർപ്പെടുത്തിയിരിക്കുന്നത്. വിസാ കാലാവധി സൗദി നീട്ടി നൽകുമെന്ന പ്രതീക്ഷയിലാണ് പ്രവാസികൾ.