ന്യൂഡെല്‍ഹി: റിസൈന്‍ മോദി ഹാഷ്ടാഗ് വീണ്ടും ഫേസ്ബുക്കിൽ തരംഗമാവുന്നു. കഴിഞ്ഞ ദിവസം നീക്കം ചെയ്‌ത ഹാഷ്ടാഗ് തിരിച്ചുവന്നതോടെ കൂടുതല്‍ ആളുകള്‍ ഏറ്റെടുക്കുകയാണ്. റിസൈന്‍ മോദി ഹാഷ്ടാഗ് ചേർത്ത പോസ്‌റ്റുകളെല്ലാം ഇന്നലെ ഫേസ്ബുക്ക് നീക്കം ചെയ്‌തിരുന്നു. ഇത് വാര്‍ത്തയായതിന് പിന്നാലെയാണ് വീണ്ടും ഹാഷ്ടാഗ് തിരിച്ചുവന്നത്. ഫേസ്ബുക്ക് സിഇഒ മാര്‍ക്ക് സുക്കര്‍ബര്‍ഗിന്റെ പേജില്‍ പ്രധാനമന്ത്രി മോദിയുമായി നില്‍ക്കുന്ന ഫോട്ടോക്ക് താഴെയും ഹാഷ്‌ടാഗുകള്‍ സജീവമാണ്.
കോവിഡ് പ്രതിസന്ധിക്കിടെ കേന്ദ്രസർക്കാരിനെ വിമർശിക്കുന്ന പോസ്‌റ്റുകൾ ഫേസ്ബുക്ക് തുടർച്ചയായി പിൻവലിച്ചിരുന്നു. വിമർശനങ്ങളെ വിലക്കുന്നു എന്ന ആരോപണം പരിഗണിക്കാതെ ആയിരുന്നു ഫേസ്ബുക്കിന്റെ നടപടി.
എറെ ചർച്ച ചെയ്യപ്പെട്ട പോസ്‌റ്റുകൾ പൊടുന്നനെ അപ്രത്യക്ഷമായത് അന്താരാഷ്‌ട്ര തലത്തിൽ അടക്കം ചർച്ചയായി. ഇതേ തുടർന്നാണ് ഫേസ്ബുക്ക് നടപടി തിരുത്തിയത്. ഹാഷ്ടാഗ് അബദ്ധവശാലാണ് ബ്ളോക്ക് ചെയ്യപ്പെട്ടത് എന്ന് ഫേസ്ബുക്ക് വിശദീകരിച്ചു. ഇന്ത്യൻ സർക്കാർ ആവശ്യപ്പെട്ടതുകൊണ്ടല്ല പോസ്‌റ്റുകൾ പിൻവലിച്ചതെന്നും ഫേസ്ബുക്ക് കൂട്ടിച്ചേർത്തിട്ടുണ്ട്. പോസ്‌റ്റുകൾ എല്ലാം പുനസ്‌ഥാപിക്കുകയും ചെയ്‌തു.
Read also: ബംഗാളില്‍ തൃണമൂല്‍ കോണ്‍ഗ്രസ് തന്നെ; എന്‍ഡിടിവി എക്‌സിറ്റ് പോള്‍
