പാലക്കാട്: ആർഎസ്‌എസ്‌ പ്രവർത്തകൻ ശ്രീനിവാസനെ കൊലപ്പെടുത്തിയ കേസിൽ ഇന്നലെ കസ്‌റ്റഡിയിൽ എടുത്ത രണ്ട് പ്രതികളുടെ അറസ്‌റ്റ് ഇന്ന് രേഖപ്പെടുത്തും. ഗൂഢാലോചനയിൽ പങ്കാളികളായ അഷ്‌റഫ്, അഷ്‌ഫാഖ് എന്നിവരുടെ അറസ്‌റ്റാണ് അന്വേഷണ സംഘം ഇന്ന് രേഖപ്പെടുത്തുക. പ്രതികളുമായുള്ള തെളിവെടുപ്പും ഇന്ന് ഉണ്ടായേക്കും.
അതേസമയം, കഴിഞ്ഞ ദിവസം അറസ്‌റ്റിലായ നാല് പേരെ കോടതി റിമാൻഡ് ചെയ്‌തു. ബിലാൽ, റിസ്‌വാൻ, സഹദ്, റിയാസുദ്ദീൻ എന്നിവരെയാണ് 14 ദിവസത്തേക്ക് റിമാൻഡ് ചെയ്‌തത്‌. അതിനിടെ, കൃത്യത്തിന് ഉപയോഗിച്ച മൂന്ന് ബൈക്കുകളും ഒരു ഗുഡ്‌സ് ഓട്ടോറിക്ഷയും ഇന്നലെ തെളിവെടുപ്പിനിടെ കണ്ടെത്തിയിരുന്നു.
ശ്രീനിവാസനെ കൊലപ്പെടുത്തിയ സംഭവത്തിൽ കൂടുതൽ പ്രതികളുണ്ടെന്നാണ് പോലീസ് പറയുന്നത്. നിലവിൽ കസ്‌റ്റഡിയിലുള്ളവരെല്ലാം കൊലയാളി സംഘത്തിനൊപ്പം പോയവരാണെന്നാണ് സൂചന. അതേസമയം, കേസിലെ മുഖ്യപ്രതികളെല്ലാം ഇപ്പോഴും ഒളിവിലാണ്. ഇവർക്കായി ഊർജിതമായ അന്വേഷണമാണ് നടക്കുന്നത്.
Most Read: തിരുവനന്തപുരത്ത് കെഎസ്ആർടിസി ഇ- ടിക്കറ്റ് മെഷീനുകൾ കത്തി നശിച്ചു
