തിരുവനന്തപുരം: സിനിമയില് 50 വർഷങ്ങൾ പൂര്ത്തിയാക്കിയ നടന് മമ്മൂട്ടിയെ സംസ്ഥാന സര്ക്കാര് ആദരിക്കുമെന്ന് സിനിമ, സാംസ്കാരിക മന്ത്രി സജി ചെറിയാന്. ഈ മാസം ആറിനാണ് മമ്മൂട്ടി സിനിമയില് അന്പത് വര്ഷങ്ങള് പൂര്ത്തിയാക്കിയത്. സജി ചെറിയാന് നിയമസഭയിലാണ് ഇക്കാര്യം അറിയിച്ചത്.
മമ്മൂട്ടിയുടെ ആദ്യം സ്ക്രീനില് പ്രത്യക്ഷപ്പെട്ട ‘അനുഭവങ്ങള് പാളിച്ചകള്’ എന്ന സിനിമ റിലീസ് ചെയ്തത് 1971 ഓഗസ്റ്റ് ആറിനാണ്. സോഷ്യല് മീഡിയയിലൂടെ നിരവധി ആരാധകരും സിനിമാ പ്രവര്ത്തകരുമാണ് തങ്ങളുടെ പ്രിയതാരത്തിന് ആശംസകള് നേര്ന്നതും അനുഭവങ്ങള് പങ്കുവെച്ചതും.
ആശംസകള്ക്ക് സോഷ്യല് മീഡിയയിലൂടെ അദ്ദേഹം നന്ദി അറിയിച്ചിരുന്നു. ‘ഓരോരുത്തരില് നിന്നുമുള്ള ഈ സ്നേഹം എന്നെ കീഴടക്കിയിരിക്കുന്നു. എന്റെ സഹപ്രവര്ത്തകരും എല്ലായിടത്തുമുള്ള ആരാധകരും. നിങ്ങള് ഓരോരുത്തരോടും നന്ദി’, എന്നാണ് ഓഗസ്റ്റ് 6ന് മമ്മൂട്ടി സോഷ്യല് മീഡിയയില് കുറിച്ചത്.
Also Read: മെസി പിഎസ്ജിയിലേക്ക് തന്നെ; സ്ഥിരീകരിച്ച് പിതാവ്