കോഴിക്കോട്: നീണ്ട അടച്ചിടലിന് ശേഷം മാനാഞ്ചിറ മൈതാനം വീണ്ടും തുറന്നു. കോവിഡ് ഇളവുകൾ പ്രഖ്യാപിച്ചതോടെ കോഴിക്കോട് ബീച്ച് ഉൾപ്പടെ തുറന്നെങ്കിലും മാനാഞ്ചിറ മൈതാനം അടഞ്ഞു കിടക്കുകയായിരുന്നു. നവീകരിച്ച ശേഷം കഴിഞ്ഞ ഡിസംബറിൽ തുറന്നിരുന്നെങ്കിലും കോവിഡ് കാരണം വീണ്ടും അടച്ചിടുകയായിരുന്നു.
അതേസമയം, പ്രഭാത സവാരിക്കാർക്ക് നേരത്തെതന്നെ മൈതാനം തുറന്ന് കൊടുത്തിരുന്നു. ശനിയാഴ്‌ച മുതലാണ് സാധാരണ രീതിയിൽ മൈതാനം തുറക്കാൻ തുടങ്ങിയത്. പ്രധാന കവാടത്തിന് പുറമെ ബിഇഎം സ്‌കൂളിന് മുൻവശത്തും പുതിയ പ്രവേശന കവാടം ഒരുക്കിയിട്ടുണ്ട്. ഓപ്പൺ സ്‌റ്റേജ്, നടപ്പാത, ഇരിപ്പിടം, എന്നിവയെല്ലാം നവീകരിച്ചിട്ടുണ്ട്.
പുതുതായി ടോയ്‌ലറ്റ് ബ്ളോക്കും കഫ്റ്റീരിയയും ഇവിടെ തുടങ്ങിയിട്ടുണ്ട്. ടോയ്‌ലറ്റ് ബ്ളോക്ക് സർക്കാരിന്റെ ടേൺ എ ബ്രേക്ക് പദ്ധതി പ്രകാരമാണ് തുറന്ന് കൊടുക്കുക. ഇതിന്റെ നടത്തിപ്പ് കുടുംബശ്രീയെ ഏൽപ്പിക്കാൻ തീരുമാനമായിട്ടുണ്ട്. അതേസമയം, കഫ്റ്റീരിയയുടെ കാര്യത്തിൽ തീരുമാനം ആയിട്ടില്ല.
Most Read: നാഗാലാന്‍ഡ് സംഘർഷം; പ്രത്യേക അന്വേഷണ സംഘത്തെ നിയോഗിച്ചെന്ന് അമിത് ഷാ
