വയനാട്: മേപ്പാടിയിൽ കാട്ടുപന്നി കുറുകെ ചാടി ഓട്ടോ മറിഞ്ഞുണ്ടായ അപകടത്തിൽ നാലര വയസുകാരന് ദാരുണാന്ത്യം. വയനാട് മേപ്പാടി ഓടത്തോട് സ്വദേശികളായ സുധീറിന്റെയും സുബൈറയുടെയും മകൻ മുഹമ്മദ് യാമിനാണ് മരിച്ചത്. ഇന്നലെ രാത്രി ഒമ്പതരയോടെയാണ് സംഭവം. സുധീറും കുടുംബവും ബന്ധുവീട്ടിൽ പോയി മടങ്ങുന്നതിനിടെ മേപ്പാടി വടുവഞ്ചാൽ നെടുങ്കരയിൽ വെച്ചാണ് പന്നി ഓട്ടോയ്ക്ക് കുറുകെ ചാടിയത്.
ഇതോടെ വെട്ടിച്ച ഓട്ടോ മറിയുകയായിരുന്നു. അപകടത്തിൽ കുട്ടിക്കാണ് കൂടുതൽ പരിക്കേറ്റത്. കുട്ടി സംഭവ സ്ഥലത്ത് വെച്ച് തന്നെ മരിച്ചിരുന്നു. സുധീറിനെയും സുബൈറയെയും പരിക്കുകളോടെ മേപ്പാടി സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്. ഇവരുടെ രണ്ടാമത്തെ മകൻ മുഹമ്മദ് അമീനും സാരമായ പരിക്കുകൾ ഉണ്ടെന്നാണ് വിവരം. യാമിന്റെ സംസ്ക്കാരം ഇന്ന് ഉച്ചക്ക് രണ്ടുമണിക്ക് ഓടത്തോട് ജുമാ മസ്ജിദിൽ നടക്കും.
Most Read: ബ്രഹ്മപുരം തീപിടിത്തം; കൊച്ചി കോർപറേഷന് 100 കോടി പിഴ ചുമത്തി