താമരശ്ശേരി : വാഹനങ്ങള്‍ പണിമുടക്കിയതോടെ വയനാട് ചുരം വഴിയുള്ള യാത്രക്കാര്‍ക്ക് കഴിഞ്ഞ ദിവസവും ദുരിതയാത്ര തന്നെ. കഴിഞ്ഞ ദിവസം രാത്രി ചുരത്തില്‍ വച്ച് ചരക്കുലോറി പണി മുടക്കിയതോടെ, മറ്റുള്ള വാഹനങ്ങൾ വണ്‍വേ ആയാണ് കടത്തി വിട്ടത്. ഇത് മൂലം യാത്രക്കാര്‍ ഏറെ സമയം കാത്ത് കിടന്നാണ് ചുരത്തില്‍ നിന്നും നീങ്ങിയത്. യന്ത്രത്തകരാര്‍ സംഭവിച്ച ചരക്കുലോറി ഇന്നലെ രാത്രിയോടെയാണ് പ്രശ്‌നം പരിഹരിച്ച് ചുരത്തില്‍ നിന്നും നീക്കം ചെയ്‌തത്.
ഇത് കൂടാതെ കഴിഞ്ഞ ദിവസം ചുരമിറങ്ങിയ ബസിന്റെ പിന്‍ഭാഗം റോഡില്‍ തട്ടി കുടുങ്ങി നിന്നതിനാല്‍ അരമണിക്കൂറോളമാണ് ഗതാഗതം ചുരത്തില്‍ തടസപ്പെട്ടത്. തുടര്‍ന്ന് ബസ് അവിടെ നിന്നും നീക്കം ചെയ്‌തതിന് പിന്നാലെയാണ് ഗതാഗതം വീണ്ടും പുനഃസ്‌ഥാപിച്ചത്. ഈ സമയം താമരശ്ശേരി പൊലീസും ചുരം സംരക്ഷണ സമിതി പ്രവര്‍ത്തകരും ചേര്‍ന്നാണ് ഗതാഗതം നിയന്ത്രിച്ചത്. ഇടക്കിടെ ഉണ്ടാകുന്ന ഇത്തരം പ്രശ്‌നങ്ങള്‍ ചുരം വഴിയുള്ള യാത്രക്കാരുടെ യാത്രയെ കാര്യമായി തന്നെ ബാധിക്കുന്നുണ്ട്.
Read also : നിയമന വിവാദം; പരാതി വാസ്‌തവ വിരുദ്ധമെന്ന് കാലിക്കറ്റ് സർവകലാശാല
