കണ്ണൂർ: തളിപ്പറമ്പ് മണ്ഡലത്തിൽ യുഡിഎഫിന്റെ ബൂത്ത് ഏജന്റിനെ മർദിച്ചതായി പരാതി. ചെറിയൂർ 1Aയിൽ കള്ളവോട്ട് തടയാനായി ഇടപെട്ട യുഡിഎഫ് ബൂത്ത് ഏജന്റിനെ എൽഡിഎഫ് ബൂത്ത് ഏജന്റ് മർദിച്ചുവെന്നാണ് പരാതി. കുറ്റിയേരി വില്ലേജിലെ വി കൃഷ്ണനാണ് മർദനമേറ്റത്.
ഇന്ന് ഉച്ചയോടെയാണ് സംഭവം നടന്നത്. ഓപ്പൺ വോട്ടിന് സഹായിയായി എത്തിയ ആൾ, ആൾമാറാട്ടം നടത്തിയത് ചോദ്യം ചെയ്തതാണ് ആക്രമണത്തിന് കാരണമെന്നാണ് കൃഷ്ണന്റെ ആരോപണം. സംഭവം പ്രിസൈഡിങ്ങ് ഓഫിസറെ അറിയിച്ചിട്ടും വോട്ട് ചെയ്യാൻ അനുവദിച്ചപ്പോഴാണ് താൻ ഇടപെട്ടതെന്നും ഇതോടെ സിപിഎമ്മിന്റെ ബൂത്ത് ഏജന്റ് തന്നെ മർദിക്കുക ആയിരുന്നെന്നും കൃഷ്ണൻ പറഞ്ഞു. പരിക്കേറ്റ ഇയാൾ നിലവിൽ തളിപ്പറമ്പ് ലൂർദ് ആശുപത്രിയിലാണ്.
അതേസമയം പ്രിസൈഡിങ് ഓഫിസർക്ക് ദേഹസ്വാസ്ഥ്യം ഉണ്ടായതിനെ തുടർന്ന് താൽക്കാലികമായി നിർത്തി വെച്ച തളിപ്പറമ്പ് മണ്ഡലം കുറ്റ്യേരി വില്ലേജിലെ ചെറിയൂർ 1A നമ്പർ ബൂത്തിലെ വോട്ടിങ് പുനരാരംഭിച്ചു. പുതിയ പ്രിസൈഡിങ് ഓഫിസറെ ബൂത്തിൽ എത്തിച്ചാണ് വോട്ടിംഗ് പുനരാരംഭിച്ചത്.
Malabar News: വോട്ട് ചെയ്യാന് എത്തിയവർക്ക് നേരെ കാട്ടുപന്നിയുടെ ആക്രമണം; രണ്ടുപേര്ക്ക് പരിക്ക്
