ന്യൂഡെൽഹി : ഉത്തരാഖണ്ഡിൽ മഞ്ഞുമല ഇടിഞ്ഞുണ്ടായ മിന്നൽ പ്രളയത്തിൽ അപകടത്തിൽപ്പെട്ട രണ്ട് പേരുടെ മൃതദേഹങ്ങൾ കൂടെ കണ്ടെടുത്തു. ഇതോടെ നിലവിൽ അപകടത്തിൽ മരിച്ച ആകെ ആളുകളുടെ എണ്ണം 40 ആയി ഉയർന്നു. അപകട സ്ഥലത്ത് കാണാതായ 164 ആളുകളെ കൂടി ഇനിയും കണ്ടെത്താനുണ്ടെന്ന് അധികൃതർ വ്യക്തമാക്കി.
കൂടാതെ പ്രളയത്തെ തുടർന്ന് തപോവൻ തുരങ്കത്തിൽപ്പെട്ട ആളുകൾക്കായി തിരച്ചിൽ തുടരുകയാണ്. തുരങ്കത്തിനുള്ളിൽ 130 മീറ്ററോളം ദുരന്തനിവാരണ സേനക്ക് എത്തിച്ചേരാൻ സാധിച്ചുവെന്ന് ഉത്തരാഖണ്ഡ് ഡിജിപി അശോക് കുമാർ അറിയിച്ചു. കൂടാതെ എത്രയും പെട്ടെന്ന് രക്ഷാപ്രവർത്തനം പൂർത്തിയാക്കാനുള്ള ശ്രമങ്ങൾ തുടരുകയാണെന്നും അദ്ദേഹം വ്യക്തമാക്കി. ഏകദേശം 35 പേരാണ് ഈ തുരങ്കത്തിനുള്ളിൽ കുടുങ്ങിയതായി കണക്കാക്കുന്നത്.
അപകടത്തിൽ മരിച്ച 26 പേരുടെ തിരിച്ചറിയാത്ത മൃതദേഹങ്ങൾ സംസ്കരിച്ചതായും അധികൃതർ വ്യക്തമാക്കി. കൂടാതെ 12 പേരുടെ മൃതദേഹങ്ങൾ തിരിച്ചറിഞ്ഞിട്ടുണ്ട്.
Read also : ചെന്നൈയിൽ പ്രധാനമന്ത്രിയുടെ പരിപാടിയിൽ കറുത്ത മാസ്കിന് വിലക്ക്