റിയാദ്: വന്ദേഭാരത് മിഷൻ ആറാം ഘട്ടത്തിൽ സൗദിയിൽ നിന്നുള്ള വിമാന സർവീസുകൾ പ്രഖ്യാപിച്ച് ഇന്ത്യൻ എംബസി. സെപ്തംബറിലെ ആദ്യ രണ്ട് ആഴ്‌ചകളിലായി 19 വിമാന സർവീസുകളാണ് സൗദിയിൽ നിന്ന് ഇന്ത്യയിലേക്ക് ഉള്ളത്. ഒൻപത് എണ്ണം കേരളത്തിലേക്കും ബാക്കിയുള്ളവ മറ്റു സംസ്ഥാനങ്ങളിലേക്കുമാണ്.
എയർ ഇന്ത്യ, എയർ ഇന്ത്യ എക്‌സ് പ്രസ്, ഇൻഡിഗോ വിമാനങ്ങളാണ് സർവീസ് നടത്തുക. ഇതിൽ റിയാദ്, ദമ്മാം വിമാനത്താവളങ്ങളിൽ നിന്നായിരിക്കും കേരളത്തിലേക്കുള്ള സർവീസുകൾ. എയർ ഇന്ത്യ എക്‌സ് പ്രസ് വിമാനങ്ങളാണ് കേരളത്തിലേക്കുള്ള സർവീസുകൾ നടത്തുക. സെപ്തംബർ നാല്, 13 തിയ്യതികളിൽ ദമ്മാമിൽ നിന്ന് തിരുവനന്തപുരത്തേക്കു സർവീസ് നടത്തും. അഞ്ച്, ഏഴ് തിയ്യതികളിലാണ് കോഴിക്കോട്ടേക്കുള്ള സർവീസ്. എട്ടിന് കൊച്ചിയിലേക്കും 14നു കണ്ണൂരിലേക്കും വിമാന സർവീസ് ഉണ്ടായിരിക്കും.
അതേസമയം, ഏഴാം തിയ്യതിയാണ് റിയാദിൽ നിന്നു തിരുവനന്തപുരത്തേക്കുള്ള സർവീസ്. 12ന് കൊച്ചിയിലേക്കും, 13ന് കോഴിക്കോട്ടേക്കും സർവീസുകൾ ഉണ്ടായിരിക്കും. എന്നാൽ ജിദ്ദയിൽ നിന്നും കേരളത്തിലേക്ക് ഇത്തവണ സർവീസുകളൊന്നുമില്ല.
യാത്ര ചെയ്യാൻ ആഗ്രഹിക്കുന്നവർ ഇന്ത്യൻ എംബസിയുടെ വെബ്‌സൈറ്റിൽ രജിസ്റ്റർ ചെയ്ത ശേഷം വിമാന കമ്പനി ഓഫീസുകളെ നേരിട്ട് ബന്ധപ്പെട്ട് ടിക്കറ്റുകൾ കരസ്ഥമാക്കണമെന്ന് ഇന്ത്യൻ എംബസി അറിയിച്ചു.
