ഇലക്ട്രിക്‌ വാഹന നിർമാണ രംഗത്തേക്ക് ചുവടുവെക്കാൻ ഒരുങ്ങുകയാണ് സ്‌മാർട് ഫോൺ നിർമാതാക്കളായ ഷവോമി. ആദ്യഘട്ടത്തിൽ 11,000 കോടിയാണ് കമ്പനി മുതൽമുടക്കുക. അടുത്ത പത്ത് വര്‍ഷത്തിനുള്ളില്‍ ഇലക്‌ട്രോണിക് വാഹന നിർമാണ രംഗത്ത് 73,400 കോടി രൂപ മുതല്‍മുടക്കാനാണ് ഷവോമിയുടെ പദ്ധതി.
ടെക് ഭീമൻമാർ തുടർച്ചയായി വാഹന നിർമാണ രംഗത്തേക്ക് കടന്നുവരികയാണ്. ഇതിന് പിന്നാലെയാണ് ഷവോമിയും വാഹന നിർമാണ രംഗത്തേക്ക് പ്രവേശിക്കുന്നതായി പ്രഖ്യാപിച്ചത്. ഇന്റര്‍നെറ്റ് സേവനങ്ങള്‍ ലഭ്യമാക്കുന്ന ചൈനീസ് കമ്പനി ബൈഡു ഇലക്‌ട്രോണിക് വാഹന നിര്‍മാണ മേഖലയിലേക്ക് എത്തുന്നതായി ജനുവരിയിൽ പ്രഖ്യാപിച്ചിരുന്നു. കാര്‍ നിര്‍മാതാക്കളായ ഗീലി ഓട്ടോമൊബൈല്‍ ഹോള്‍ഡിംഗ്‌സ് ലിമിറ്റഡുമായി ചേര്‍ന്ന് ഇലക്ട്രിക്‌ വെഹിക്കിള്‍ യൂണിറ്റ് വികസിപ്പിക്കുന്നതായും കമ്പനി അറിയിച്ചിരുന്നു.
ഫെബ്രുവരിയില്‍ ചൈനീസ് സ്‌മാർട് ഫോണ്‍ ഭീമനായ ഹുവായ് ടെക്‌നോളജീസ് കോ ലിമിറ്റഡും ഈ രംഗത്തേക്ക് പ്രവേശിക്കുന്നതായി റിപ്പോർട്ടുകൾ ഉണ്ടായിരുന്നു. ഇതിന് പിന്നാലെയാണ് ഷവോമിയുടെ വരവ്. ചൈനീസ് വാഹന നിര്‍മാതാക്കളായ ഗ്രേറ്റ് വാള്‍ മോട്ടോഴ്‌സിന്റെ സഹകരണത്തോടെ ആയിരിക്കും ഷവോമി ഇലക്ട്രിക്‌ വാഹനങ്ങള്‍ വിപണിയില്‍ എത്തിക്കുകയെന്നാണ് റിപ്പോര്‍ട്ടുകള്‍.
Also Read: ആർബിഐയുടെ പുതിയ നിയമം ഉടൻ; ബിൽ പേയ്‌മെന്റുകൾ തടസപ്പെട്ടേക്കാം
