ന്യൂഡെല്ഹി: കോണ്ഗ്രസ് വിട്ട് ബിജെപിയിലേക്ക് ചേക്കേറിയ ജിതിന് പ്രസാദയെ അഭിനന്ദിച്ച് ബിജെപി. നേതാവും രാജ്യസഭാ എംപിയുമായ ജ്യോതിരാദിത്യ സിന്ധ്യ. ജിതിന് തനിക്ക് സഹോദരൻ ആണെന്നും അദ്ദേഹത്തിന്റെ തീരുമാനത്തിൽ അഭിനന്ദനം അറിയിക്കുന്നുവെന്നും സിന്ധ്യ പറഞ്ഞു.
“എന്റെ ചെറിയ സഹോദരനെ പോലെ കാണുന്ന വ്യക്തിയാണ് ജിതിന്. ബിജെപിയിലേക്ക് അദ്ദേഹത്തെ സ്വാഗതം ചെയ്യുന്നു. ഇപ്പോള് എടുത്ത ഈ തീരുമാനത്തില് അദ്ദേഹത്തെ അഭിനന്ദിക്കുന്നു”- സിന്ധ്യ പറഞ്ഞു.
ഉത്തർപ്രദേശിൽ നിന്ന് രണ്ടുതവണ ലോക്സഭയിലെത്തിയ പ്രസാദ, കോൺഗ്രസ് നേതാവ് ജിതേന്ദ്ര പ്രസാദയുടെ മകനാണ്. മുൻ പ്രധാനമന്ത്രിമാരായ രാജീവ് ഗാന്ധിയുടെയും പിവി നരസിംഹറാവുവിന്റേയും രാഷ്ട്രീയ ഉപദേഷ്ടാവായി സേവനം അനുഷ്ഠിച്ചിരുന്നയാളാണ് ജിതേന്ദ്ര പ്രസാദ്.
ഇന്ന് ഉച്ചക്ക് പീയൂഷ് ഗോയലിന്റെ സാന്നിധ്യത്തിലാണ് ജിതിന് പ്രസാദ ബിജെപിയിൽ ചേർന്നത്. പ്രസാദയുടെ വരവോടെ ഉത്തർപ്രദേശിലെ ബ്രാഹ്മണ സമൂഹത്തിൽ ശക്തമായ സ്വാധീനം ചെലുത്താൻ സാധിക്കുമെന്നാണ് ബിജെപിയുടെ കണക്കുകൂട്ടലുകൾ.
Read also: മുംബൈയില് കനത്ത മഴയും വെള്ളക്കെട്ടും; റെഡ് അലര്ട് പ്രഖ്യാപിച്ചു