മസ്‌ക്കറ്റ് : കഴിഞ്ഞ 24 മണിക്കൂറിൽ ഒമാനിൽ 337 പേർക്ക് കൂടി കോവിഡ് സ്‌ഥിരീകരിച്ചു. കൂടാതെ കോവിഡ് ബാധയെ തുടർന്ന് കഴിഞ്ഞ ദിവസം രാജ്യത്ത് ഒരാൾ കൂടി മരിച്ചതായും ആരോഗ്യമന്ത്രാലയം വ്യക്‌തമാക്കി. കഴിഞ്ഞ ദിവസത്തെ കണക്കുകൾ കൂടിയാകുമ്പോൾ രാജ്യത്ത് ഇതുവരെ കോവിഡ് ബാധിച്ചവരുടെ ആകെ എണ്ണം 1,37,929 ആയി ഉയർന്നു. കൂടാതെ ഇതുവരെ രാജ്യത്ത് റിപ്പോർട് ചെയ്‍ത ആകെ കോവിഡ് മരണം 1,544 ആയും ഉയർന്നിട്ടുണ്ട്.
കഴിഞ്ഞ 24 മണിക്കൂറിൽ രാജ്യത്ത് കോവിഡ് മുക്‌തരായവരുടെ എണ്ണം കോവിഡ് ബാധിതരേക്കാൾ കുറവാണ്. 252 പേരാണ് രാജ്യത്ത് കഴിഞ്ഞ ദിവസം കോവിഡ് മുക്‌തരായത്. ഇതോടെ രാജ്യത്തെ ആകെ കോവിഡ് ബാധിതരിൽ 1,29,543 പേരും കോവിഡ് മുക്‌തരായിട്ടുണ്ട്. 94 ശതമാനമാണ് രാജ്യത്തെ നിലവിലെ കോവിഡ് രോഗമുക്‌തി നിരക്കെന്ന് ആരോഗ്യ പ്രതിരോധ മന്ത്രാലയം വ്യക്‌തമാക്കി.
കഴിഞ്ഞ 24 മണിക്കൂറിനിടെ രോഗം സ്‌ഥിരീകരിച്ച 28 പേരെ കൂടി ആശുപത്രികളിൽ ചികിൽസയിൽ പ്രവേശിപ്പിച്ചു. ഇതോടെ രാജ്യത്ത് നിലവിൽ ആശുപത്രികളിൽ ചികിൽസയിൽ കഴിയുന്നവരുടെ ആകെ എണ്ണം 141 ആണ്. ഇവരിൽ 42 പേരുടെ നില ഗുരുതരമായതിനെ തുടർന്ന് തീവ്രപരിചരണ വിഭാഗങ്ങളിൽ ചികിൽസയിൽ കഴിയുകയാണ്.
Read also : യുഎഇയില്‍ ഇന്ന് 3,236 പേര്‍ക്ക് കൂടി കോവിഡ് സ്‌ഥിരീകരിച്ചു
