തിരുവനന്തപുരം: ഭരണമികവില് വീണ്ടും ഒന്നാമതായി കേരളം. പബ്ളിക് അഫയേര്സ് സെന്റര് പ്രസിദ്ധീകരിച്ച പബ്ളിക് അഫയേര്സ് ഇന്ഡക്സ് 2021 (PAI)ല് ആണ് വലിയ സംസ്ഥാനങ്ങളില് ഏറ്റവും മികച്ച ഭരണം കാഴ്ചവെച്ച സംസ്ഥാനമായി കേരളത്തെ തിരഞ്ഞെടുത്തിരിക്കുന്നത്. മുഖ്യമന്ത്രി പിണറായി വിജയനാണ് ഇക്കാര്യം അറിയിച്ചത്.
ഇടതുപക്ഷ സര്ക്കാറിനൊപ്പം അണിനിരന്ന കേരളത്തിനൊന്നാകെ അഭിമാനിക്കാവുന്ന നേട്ടമാണിതെന്നും കൂടുതല് മികവിലേക്കുയരാന് ഇത് നമുക്ക് പ്രചോദനമാകണമെന്നും മുഖ്യമന്ത്രി ഫേസ്ബുക്കിൽ പങ്കുവെച്ച കുറിപ്പിൽ പറഞ്ഞു. കേരളത്തിന്റെ നൻമയ്ക്കും പുരോഗതിക്കുമായി ഇനിയും കൈകള് കോര്ത്ത് മുന്നോട്ടു പോകാമെന്നും മുഖ്യമന്ത്രി കുറിച്ചു.
സമത്വം, വളര്ച്ച, സുസ്ഥിരത എന്നീ മാനകങ്ങളെ അടിസ്ഥാനമാക്കിയാണ് പബ്ളിക് അഫയേര്സ് ഇന്ഡക്സ് തയ്യാറാക്കിയിട്ടുള്ളത്.
ദേശീയ തൊഴിലുറപ്പ് പദ്ധതി, നാഷണല് ഹെല്ത്ത് മിഷൻ പോലുള്ള പദ്ധതികളുടെ നടത്തിപ്പും കോവിഡ് പ്രതിരോധവും ഉള്പ്പടെയുള്ള നിരവധി കാര്യങ്ങളിൽ എത്രമാത്രം മികവ് പുലര്ത്തി എന്നതും പഠന വിധേയമാക്കിയിട്ടുണ്ടെന്ന് മുഖ്യമന്ത്രി അറിയിച്ചു.
അടിസ്ഥാന സൗകര്യ വികസനം, വിദ്യാഭ്യാസം, ആരോഗ്യം, തൊഴില്, പ്രകൃതി സൗഹൃദവും സര്വതല സ്പര്ശിയുമായ വികസനം തുടങ്ങി നിരവധി പ്രധാന സൂചകങ്ങളില് കേരളം മികച്ച പ്രവര്ത്തനം കാഴ്ചവെച്ചതായാണ് പഠനത്തില് പറയുന്നത്.
Most Read: കോവാക്സിൻ; ലോകാരോഗ്യ സംഘടനയുടെ ഉപയോഗാനുമതി ഇന്ന് ലഭിച്ചേക്കും