മലപ്പുറം: മാറഞ്ചേരി ഗവൺമെന്റ് ഹയർ സെക്കണ്ടറി സ്കൂളിൽ 34 അധ്യാപകർക്കും 150 വിദ്യർഥികൾക്കും കോവിഡ് സ്ഥിരീകരിച്ചതിന് പിന്നാലെ പെരുമ്പടമ്പ് വന്നേരി ഹയർ സെക്കണ്ടറി സ്കൂളിലും കോവിഡ് വ്യാപനം. വന്നേരി സ്കൂളിൽ 40 അധ്യാപകർക്കും 36 വിദ്യാർഥികൾക്കുമാണ് കോവിഡ് സ്ഥിരീകരിച്ചത്. ഇതിനെ തുടർന്ന് ഇരുസ്കൂളുകളും അടിയന്തിരമായി അടച്ചുപൂട്ടി. 10, 12 ക്ളാസുകളിലെ വിദ്യാർഥികൾക്ക് സ്കൂളുകളിൽ പഠനം ആരംഭിച്ചിരുന്നു.
മാറഞ്ചേരി സമൂഹാരോഗ്യ കേന്ദ്രത്തിലെ ജീവനക്കാരുടെ സഹകരണത്തോടെ വെള്ളിയാഴ്ചയാണ് 10ആം ക്ളാസ് വിദ്യാർഥികളുടെയും അധ്യാപകരുടെയും സാമ്പിൾ പരിശോധനക്ക് വിധേയമാക്കിയത്. കോവിഡ് സ്ഥിരീകരിച്ചവരിൽ മാറഞ്ചേരി, വെളിയങ്കോട്, പെരുമ്പടപ്പ് പഞ്ചായത്തുകളിലും തൃശൂർ ജില്ലയിലെ വടക്കേകാട് മേഖലയിലും ഉൾപ്പെടുന്ന പ്രദേശങ്ങളിലെ വിദ്യാർഥികൾ ഉൾപ്പെട്ടിട്ടുണ്ട്.
മാറഞ്ചേരി സ്കൂളിലെ പ്ളസ്ടു വിഭാഗത്തിലെ അധ്യാപകരുടെയും വിദ്യാർഥികളുടെയും സാമ്പിൾ പരിശോധിച്ചിട്ടില്ല. ഇവരുടെ സാമ്പിൾ പരിശോധന തിങ്കളാഴ്ച നടത്തുമെന്നാണ് ആരോഗ്യവകുപ്പ് അറിയിച്ചിരിക്കുന്നത്.
നിലവിൽ കോവിഡ് സ്ഥിരീകരിച്ച വിദ്യാർഥികളും അധ്യാപകരും അവരുമായി സമ്പർക്കത്തിൽ ഏർപ്പെട്ടവരും നിരീക്ഷണത്തിൽ പോകണമെന്ന് ആരോഗ്യവകുപ്പ് കർശന നിർദേശം നൽകിയിട്ടുണ്ട്. വരുംദിവസങ്ങളിൽ മറ്റു വിദ്യാലയങ്ങളിലേക്കും സാമ്പിൾ പരിശോധന വ്യാപിപ്പിക്കാനും ആരോഗ്യവകുപ്പ് ആലോചിക്കുന്നുണ്ട്.
Read also: ആംഗ്യ ഭാഷയിൽ ക്ളാസുകൾ, പ്രത്യേക ഓഡിയോ ബുക്ക്; ചരിത്രം കുറിക്കാൻ ഫസ്റ്റ് ബെൽ