കോഴിക്കോട്: പയ്യോളി ദേശീയപാതയിൽ ഇരിങ്ങൽ മങ്ങൂൽപാറ ഇറക്കത്തിലുണ്ടായ വാഹനാപകടത്തിൽ യുവാവിന് ദാരുണാന്ത്യം. കാസർഗോഡ് വിദ്യാനഗർ സ്വദേശി ‘സുഷമ’ നിവാസിൽ എ പ്രദീപ് കുമാർ (38) ആണ് മരിച്ചത്.
ശനിയാഴ്‌ച ഉച്ചക്ക് പന്ത്രണ്ടരയോടെ ആയിരുന്നു അപകടം. വടകര ഭാഗത്തേക്ക് പോവുകയായിരുന്ന പ്രദീപ് കുമാറിന്റെ സ്‌കൂട്ടറിൽ എതിരെ വന്ന മറ്റൊരു വാഹനം ഇടിക്കുകയായിരുന്നു . ഇടിയുടെ ആഘാതത്തിൽ റോഡിൽ വീണ പ്രദീപിന്റെ ദേഹത്തിലൂടെ സ്‌കൂട്ടറിന്റെ തൊട്ടുപുറകിൽ ഉണ്ടായിരുന്ന ലോറി കയറി ഇറങ്ങുകയായിരുന്നു .
മേപ്പയൂർ കാരയാട്ടെ ഭാര്യവീട്ടിൽ നിന്നും സ്വദേശത്തേക്ക് മടങ്ങവെയാണ് ഇദ്ദേഹത്തിന് അപകടമുണ്ടായത്. വടകരയിൽ നിന്നെത്തിയ അഗ്‌നിശമന സേനയും, പയ്യോളി പോലീസും ചേർന്നാണ് മൃതദേഹം പുറത്തെടുത്തത്.
Read also: ജില്ലയിൽ തണ്ടർ ബോൾട്ട് സംഘത്തിന് നേരെ കാട്ടാന ആക്രമണം; എഎസ്ഐക്ക് പരിക്ക്
