തേഞ്ഞിപ്പലം: കാലിക്കറ്റ് സര്‍വകലാശാലയുടെ കീഴില്‍ സ്വതന്ത്ര്യ ടിവി ചാനല്‍ തുടങ്ങുന്നു. യുജിസിയുടെ നിയന്ത്രണത്തിലുള്ള എഡ്യൂക്കേഷനല്‍ മള്‍ട്ടിമീഡിയ റിസര്‍ച്ച് സെന്ററിന്റെ (ഇഎംഎംആര്‍സി) നേതൃത്വത്തിലാണ് ചാനല്‍ ആരംഭിക്കുന്നത്. കേരളത്തിലെ ഉന്നതവിദ്യാഭ്യാസ മേഖലക്ക് മുതല്‍ക്കൂട്ടാകുന്ന രീതിയിലാണ് ചാനലിന്റെ പ്രവര്‍ത്തനം ക്രമീകരിക്കുക. സംസ്ഥാനത്തെ കേബിള്‍ ശൃംഖലകളുമായി സഹകരിച്ചാണ് പദ്ധതി നടപ്പിലാക്കാന്‍ ഉദ്ദേശിക്കുന്നതെന്ന് ഡയറക്ടര്‍ ഡി. ദാമോദര്‍ പ്രസാദ് അറിയിച്ചു.
കേരളത്തിലെ യുജി, പിജി വിദ്യാര്‍ഥികള്‍ക്കായി ആയിരത്തോളം വീഡിയോ ക്ലാസ്സുകളാണ് ഇഎംഎംആര്‍സി തയാറാക്കിയിരിക്കുന്നത്. ഈ ക്ലാസ്സുകളും ചാനലിലേക്ക് ഉപയോഗിക്കാനാകും. സര്‍വകലാശാല ലൈബ്രറിയുടെ കീഴില്‍ 88 വിഷയങ്ങളിലെ ബിരുദവിദ്യാര്‍ത്ഥികള്‍ക്കായി ഡിജിറ്റല്‍ ക്ലാസ്സുകളുടെ ലോഞ്ചിങ്ങും ഉടനുണ്ടാകും. നിലവില്‍ സര്‍വകലാശാല ലൈബ്രറിയിലെത്തുന്ന കുട്ടികള്‍ക്ക് ഈ പദ്ധതി ലഭ്യമാക്കുന്നുണ്ട്.
