പത്തനംതിട്ട: ചിറ്റാറിലെ മത്തായിയുടെ കസ്റ്റഡി മരണവുമായി ബന്ധപ്പെട്ട് സിബിഐ എഫ്ഐആര് സമര്പ്പിച്ചു. തിരുവനന്തപുരം സിജെഎം കോടതിയിലാണ് എഫ്ഐആര് സമര്പ്പിച്ചത്. കേസില് ആരും പ്രതി ചേര്ക്കപ്പെട്ടിട്ടില്ല. മനഃപൂര്വമല്ലാത്ത നരഹത്യ അടക്കം 10 വകുപ്പുകള് ചുമത്തിയാണ് എഫ്ഐആര് രജിസ്റ്റര് ചെയ്തിരിക്കുന്നത്. മത്തായിയുടെ മൃതദേഹം വീണ്ടും ഇന്ക്വസ്റ്റ് ചെയ്യാനും പോസ്റ്റുമോര്ട്ടം നടത്താനും സിബിഐ സംസ്ഥാന സര്ക്കാരിന് അപേക്ഷ നല്കിയിട്ടുണ്ട്. മജിസ്ട്രേറ്റിന്റെ സാന്നിധ്യത്തിലാകും ഇന്ക്വസ്റ്റ് നടത്തുക. പോസ്റ്റ്മോര്ട്ടം നടത്തുന്നതിനായി 3 ഫോറന്സിക് ഡോക്ടര്മാരെയും സംഘത്തില് ഉള്പ്പെടുത്തും.
വനംവകുപ്പ് സ്ഥാപിച്ച സിസിടിവി ക്യാമറ നശിപ്പിച്ചുവെന്നാരോപിച്ചാണ് ജൂലൈ 28ന് മത്തായിയെ കസ്റ്റഡിയിലെടുത്തത്. അന്നേ ദിവസം വൈകുന്നേരം 6 മണിക്ക് അദ്ദേഹത്തെ കിണറ്റില് മരിച്ചനിലയില് കണ്ടെത്തുകയായിരുന്നു. പോസ്റ്റ്മോര്ട്ടത്തിന് ശേഷം ജൂലൈ 31ന് മൃതദേഹം ബന്ധുക്കള്ക്ക് വിട്ടുനല്കിയെങ്കിലും, മരണത്തില് ഉത്തരവാദികളായവരെ അറസ്റ്റ് ചെയ്യാതെ മൃതദേഹം സംസ്കരിക്കയില്ലായെന്ന നിലപാടെടുക്കുകയായിരുന്നു കുടുംബാംഗങ്ങള്. കോടതി ഇക്കാര്യത്തില് ഇടപെട്ടെങ്കിലും മൃതദേഹം ഇതുവരെയും സംസ്കരിച്ചിട്ടില്ല.