തിരുവനന്തപുരം: ഐഎൻഎല്ലിൽ മഞ്ഞുരുകി തുടങ്ങുന്നു. അബ്ദുൾ വഹാബ് വിഭാഗവുമായി മന്ത്രി അഹമ്മദ് ദേവർകോവിൽ അനുനയ ചർച്ച നടത്തി. ചർച്ചയിൽ ശുഭപ്രതീക്ഷയെന്നാണ് വിമത നേതാക്കളുടെ പ്രതികരണം. പ്രശ്നങ്ങൾ പരിഹരിക്കണമെന്ന് എൽഡിഎഫ് നിർദ്ദേശിച്ചതിനെ തുടർന്നാണ് ഇരുവിഭാഗവും കൂടിക്കാഴ്ച നടത്തിയത്.
ഐഎൻഎല്ലിലെ തർക്കം ഇടതുമുന്നണിക്ക് നാണക്കേടുണ്ടാക്കിയാൽ അഹമ്മദ് ദേവർകോവിൽ മന്ത്രിസ്ഥാനം ഒഴിഞ്ഞ് പുറത്ത് പോകേണ്ടി വന്നേക്കുമെന്ന് പാർട്ടി നേരത്തെ മുന്നറിയിപ്പ് നൽകിയിരുന്നു. കൂട്ടത്തല്ലിനൊടുവിൽ പിളർന്ന ഐഎൻഎല്ലിലെ ഇരുവിഭാഗങ്ങളെയും ഒന്നിച്ച് പാർട്ടിയിൽ തുടരാൻ അനുവദിക്കില്ലെന്നും എൽഡിഎഫ് അറിയിച്ചിരുന്നു. ഐഎൻഎൽ നേതൃത്വത്തോട് കടുത്ത അതൃപ്തി അറിയിച്ച സിപിഎം പ്രശ്നങ്ങൾ ഉടൻ പരിഹരിക്കണമെന്നും നിർദ്ദേശിച്ചു. ഇതിനെ തുടർന്നാണ് മന്ത്രി ചർച്ചക്ക് എത്തിയത്.
Also Read: സഹകരണ ബാങ്കിലെ തട്ടിപ്പ് തടയാൻ സർക്കാർ നിയമ ഭേദഗതിക്ക് ഒരുങ്ങുന്നു