ന്യൂഡെൽഹി: നിർമാണ ചിലവിലെ അനിയന്ത്രിതമായ കുതിച്ച് കയറ്റം കണക്കിലെടുത്ത് കാറുകളുടെ വില വർധിപ്പിക്കാൻ ഒരുങ്ങി ഹോണ്ട ഇന്ത്യ. എല്ലാ മോഡലുകളുടെയും വില ആഗസ്‌റ്റ് മാസം മുതല്‍ വര്‍ധിപ്പിക്കുമെന്നാണ് ഹോണ്ട ഔദ്യോഗികമായി പുറത്തിറക്കിയ പത്രക്കുറിപ്പിലൂടെ അറിയിച്ചത്.
അസംസ്‌കൃത വസ്‌തുക്കളുടെ വില ഉയർന്നതിനെ തുടര്‍ന്നാണ് വില വര്‍ധനവെന്ന തീരുമാനം എടുക്കാൻ നിർബന്ധിതരായതെന്ന് ഹോണ്ട അറിയിച്ചു. അവശ്യ ഉല്‍പാദന ഘടകങ്ങളായ സ്‌റ്റീല്‍, മറ്റ് ലോഹങ്ങള്‍ എന്നിവയുടെ വില ഉയർന്നതോടെ നഷ്‌ടം നികത്താനാണ് ഇപ്പോള്‍ പുതിയ തീരുമാനവുമായി കമ്പനി രംഗത്തെത്തിയത്.
രാജ്യത്തെ മുന്‍നിര വാഹന നിര്‍മാതാക്കളെല്ലാം തന്നെ കാറുകളുടെ വില വര്‍ധിപ്പിക്കുമെന്ന റിപ്പോര്‍ട് നേരത്തെ പുറത്തുവന്നിരുന്നു. ഇതിന് പിന്നാലെ മാരുതി സുസൂക്കിയും ടാറ്റയും അടക്കമുള്ള കമ്പനികള്‍ ഈ റിപ്പോർട് ശരിവച്ച് രംഗത്ത് വരികയും ചെയ്‌തു. ഇപ്പോൾ ഹോണ്ടയും സമാന പാതയിലാണ്. എന്നാൽ എത്ര ശതമാനം വില വർധിപ്പിക്കും എന്ന കാര്യത്തിൽ ഇതുവരെയും തീരുമാനം ആയിട്ടില്ല.
Read Also: ടോക്കിയോ ഒളിമ്പിക്‌സ്; ഇന്ത്യൻ പതാക വഹിക്കുക മേരികോമും, മൻപ്രീത് സിംഗും
