ഡെൽഹി: രാജ്യത്ത് റിപ്പോർട് ചെയ്യുന്നതിൽ 51.51 ശതമാനം കോവിഡ് കേസുകളും കേരളത്തിലാണെന്ന് കേന്ദ്ര ആരോഗ്യ മന്ത്രാലയം. രാജ്യത്ത് ഒരു ലക്ഷത്തിലധികം പേർ ചികിൽസയിൽ ഉളളതും കേരളത്തിൽ മാത്രമാണ്. തിരുവനന്തപുരം, കോട്ടയം, ആലപ്പുഴ എന്നീ ജില്ലകൾ ഒഴികെ സംസ്‌ഥാനത്ത് മറ്റെല്ലാ ജില്ലകളിലും രോഗവ്യാപനം രൂക്ഷമാണെന്നും ആരോഗ്യ മന്ത്രാലയം അറിയിച്ചു.
മൂപ്പതിനായിരത്തിൽ താഴെയാണ് രാജ്യത്ത് പ്രതിദിന കോവിഡ് കണക്ക്. ദേശീയ നിരക്കിൽ പ്രതിദിന കേസുകൾ കുറയുമ്പോഴും കേരളത്തിൽ മാറ്റം പ്രകടമാകുന്നില്ല. മലപ്പുറം, കോഴിക്കോട്, പത്തനംതിട്ട ജില്ലകളിൽ റിപ്പോർട് ചെയ്‌തതിൽ 80 ശതമാനം കേസുകളും ഡെൽറ്റ വകഭേദമാണ്.
രാജ്യത്ത് 44 ജില്ലകളിൽ പ്രതിദിന ടിപിആർ 10 ശതമാനത്തിന് മുകളിലാണ്. കോവിഡ് പുതിയ വകഭേദങ്ങളുടെ സാധ്യത തള്ളിക്കളയാതെ ആരോഗ്യ മന്ത്രാലയം പുതിയ വകഭേദങ്ങൾ നിരീക്ഷിക്കുകയാണെന്നും വ്യക്‌തമാക്കി. അതേസമയം കഴിഞ്ഞ 24 മണിക്കൂറിനിടെ 28,204 പേർക്ക് രോഗം സ്‌ഥിരീകരിച്ചു. രാജ്യത്ത് 5 മാസത്തിനിടെ റിപ്പോർട് ചെയ്യുന്ന ഏറ്റവും കുറഞ്ഞ പ്രതിദിന കണക്കാണിത്.
Must Read: അഫ്ഗാനിൽ കുടുങ്ങിയ ഇന്ത്യക്കാർ ഉടൻ തിരികെ എത്തണം; കേന്ദ്രം
