മുംബൈ: വാക്സിൻ ക്ഷാമം രൂക്ഷമായതിനെ തുടർന്ന് മഹാരാഷ്ട്രയിൽ പലയിടത്തും വിതരണ കേന്ദ്രങ്ങൾ അടച്ചുപൂട്ടി. സതാര ജില്ലയിൽ വാക്സിൻ ഇല്ലാത്തതിനെ തുടർന്ന് വിതരണം നിർത്തിവെച്ചതായി ജില്ലാ പരിഷത് ചീഫ് എക്സിക്യൂട്ടീവ് ഓഫീസർ വിനയ് ഗൗഡ പറഞ്ഞു. ഇതുവരെ 45 വയസിന് മുകളിലുള്ള 2.6 ലക്ഷം പേർക്ക് മാത്രമാണ് കോവിഡ് വാക്സിന്റെ ആദ്യ ഡോസെങ്കിലും വിതരണം ചെയ്തത്.
പൻവേലിലും വാക്സിൻ വിതരണം നിർത്തിവെച്ചിട്ടുണ്ട്. വാക്സിൻ ക്ഷാമത്തെ തുടർന്നാണ് വിതരണം നിർത്തിവെച്ചതെന്ന് പൻവേൽ മുൻസിപ്പൽ കോർപറേഷൻ അധികൃതർ പറഞ്ഞു. പൂണെയിലെ 100ഓളം വാക്സിൻ വിതരണ കേന്ദ്രങ്ങളിൽ ക്ഷാമത്തെ തുടർന്ന് വാക്സിൻ വിതരണം നിർത്തിവെച്ചുവെന്ന് എൻസിപി നേതാവ് സുപ്രിയ സുലെ ട്വീറ്റ് ചെയ്തു.
മഹാരാഷ്ട്രയിൽ വാക്സിൻ ക്ഷാമമുണ്ടെന്ന പരാതിയുമായി നേരത്തെ മുഖ്യമന്ത്രി ഉദ്ധവ് താക്കറെ രംഗത്തെത്തിയിരുന്നു. എന്നാൽ വാക്സിൻ വിതരണത്തിൽ പ്രശ്നങ്ങൾ ഇല്ലെന്നായിരുന്നു കേന്ദ്ര ആരോഗ്യമന്ത്രി ഹർഷവർധന്റെ നിലപാട്.