ആലപ്പുഴ: സിപിഐഎം ആലപ്പുഴ ജില്ലാ സമ്മേളനം മാറ്റിവച്ചു. സംസ്‌ഥാനത്ത് കോവിഡ് വ്യാപന സാഹചര്യത്തിൽ സിപിഐഎം ജില്ലാ സമ്മേളനങ്ങൾ നടത്തുന്നതിനെതിരെ ഹൈക്കോടതി വിമർശനം ഉന്നയിച്ചതിനു പിന്നാലെയാണ് തീരുമാനം. പുതുക്കിയ തീയതി പിന്നീട് അറിയിക്കുമെന്ന് ആലപ്പുഴ ജില്ലാ സെക്രട്ടറി ആർ നാസർ അറിയിച്ചു. ഈ മാസം 28, 29, 30 തീയതികളിൽ നടത്താനിരുന്ന സമ്മേളനമാണ് മാറ്റിവെച്ചത്.
ഹൈക്കോടതി ഇടപെടലിന് പിന്നാലെ ഒറ്റ ദിവസം കൊണ്ട് കാസർഗോഡ് സമ്മേളനം സിപിഐഎമ്മിന് അവസാനിപ്പിക്കേണ്ടി വന്നു. തൃശൂരിലും സമ്മേളനം ഇന്ന് അവസാനിപ്പിക്കാനാണ് തീരുമാനം. സംസ്‌ഥാനത്ത് കോവിഡ് മൂന്നാം തരംഗം വ്യാപകമാകുന്ന പശ്‌ചാത്തലത്തിൽ രോഗികളുടെ എണ്ണം കുത്തനെ ഉയരുമ്പോഴും പാർട്ടി സമ്മേളനങ്ങൾ നടത്തുന്നതിനെതിരെ കടുത്ത വിമർശനങ്ങൾ ഉയർന്നിരുന്നു.
Read also: യുപിയിൽ മുഖ്യമന്ത്രി സ്‌ഥാനാർഥി ആകുമെന്ന് പറഞ്ഞിട്ടില്ല; പ്രിയങ്ക ഗാന്ധി
