ന്യൂഡെൽഹി : രാജ്യത്ത് ആശങ്കകൾക്ക് നേരിയ ആശ്വാസം നൽകിക്കൊണ്ട് പ്രതിദിന കോവിഡ് ബാധയിൽ കുറവ് രേഖപ്പെടുത്തി. കഴിഞ്ഞ 24 മണിക്കൂറിൽ രാജ്യത്ത് റിപ്പോർട് ചെയ്‌ത ആകെ കോവിഡ് കേസുകൾ ഒന്നര ലക്ഷത്തിന് താഴെയാണ്. 1,27,510 പേർക്കാണ് കഴിഞ്ഞ 24 മണിക്കൂറിൽ രാജ്യത്ത് രോഗം സ്‌ഥിരീകരിച്ചത്‌. കൂടാതെ പ്രതിദിന മരണസംഖ്യയിലും കഴിഞ്ഞ ദിവസം രാജ്യത്ത് കുറവ് രേഖപ്പെടുത്തിയിട്ടുണ്ട്. 2,795 ആളുകളാണ് കഴിഞ്ഞ 24 മണിക്കൂറിൽ രാജ്യത്ത് കോവിഡിനെ തുടർന്ന് മരണപ്പെട്ടത്.
കഴിഞ്ഞ 54 ദിവസത്തിനിടെ രാജ്യത്ത് റിപ്പോർട് ചെയ്‌ത കുറഞ്ഞ പ്രതിദിന കോവിഡ് കണക്കുകളാണ് ഇത്. നിലവിൽ രാജ്യത്തെ ആകെ കോവിഡ് ബാധിതരുടെ എണ്ണം 2,81,75,044 ആയി ഉയർന്നു. അതേസമയം തന്നെ ഇവരിൽ 2,59,47,629 ആളുകളും ഇതുവരെ രോഗമുക്‌തി നേടിയതാണ് ആരോഗ്യ മന്ത്രാലയത്തിന്റെ കണക്കുകൾ സൂചിപ്പിക്കുന്നത്. കൂടാതെ ഔദ്യോഗിക കണക്കുകൾ പ്രകാരം രാജ്യത്ത് ഇതുവരെ കോവിഡ് ബാധിച്ച് മരിച്ചവരുടെ ആകെ എണ്ണം 3,31,895 ആണ്.
നിലവിലത്തെ കണക്കുകൾ പ്രകാരം രാജ്യത്ത് കോവിഡ് ബാധിച്ച് ചികിൽസയിൽ കഴിയുന്നവരുടെ ആകെ എണ്ണം 18,95,520 ആണ്. കൂടാതെ 92.09 ശതമാനമാണ് രാജ്യത്തെ നിലവിലത്തെ കോവിഡ് മുക്‌തി നിരക്ക്. കോവിഡ് വ്യാപനം ഉയർന്ന സാഹചര്യത്തിൽ മിക്ക സംസ്‌ഥാനങ്ങളും ലോക്ക്ഡൗൺ നടപടികളിലേക്ക് കടന്നതോടെയാണ് നിലവിൽ രോഗവ്യാപന തോതിൽ കുറവ് രേഖപ്പെടുത്തിയത്. രാജ്യത്ത് 21,60,46,638 ആളുകൾ ഇതുവരെ കോവിഡ് വാക്‌സിൻ സ്വീകരിച്ചതായും ആരോഗ്യ പ്രതിരോധ മന്ത്രാലയത്തിന്റെ കണക്കുകൾ വ്യക്‌തമാക്കുന്നുണ്ട്.
Read also : ഛത്തീസ്ഗഢില്‍ മാവോയിസ്‌റ്റ് നേതാവിനെ ഏറ്റുമുട്ടലിൽ വധിച്ചു
