ന്യൂ ഡെൽഹി: ക്രെഡിറ്റ്-ഡെബിറ്റ് കാർഡുകൾ, ആരോഗ്യ ഇൻഷുറൻസ്, ഡ്രൈവിംഗ് ലൈസൻസ് തുടങ്ങിയ വിവിധ മേഖലകളിൽ കേന്ദ്രസർക്കാർ പ്രഖ്യാപിച്ച പുതിയ മാറ്റങ്ങൾ ഇന്ന് (ഒക്‌ടോബർ 1) മുതൽ പ്രാബല്യത്തിൽ വരും. ഇന്ന് മുതൽ നടപ്പിലാകുന്ന വിവിധ മേഖലകളും മാറ്റങ്ങളും ചുവടെ നൽകുന്നു;
റോഡ് ഗതാഗത, ദേശീയപാത മന്ത്രാലയം കൊണ്ടുവന്ന ഭേദഗതി പ്രകാരം ഇന്ന് മുതൽ ഡ്രൈവർമാർ അവരുടെ ആർ‌സിയുടെയും ഡ്രൈവിംഗ് ലൈസൻസിന്റെയും പകർപ്പ് കൈവശം വെക്കേണ്ടതില്ല. രാജ്യമെങ്ങും ഒരേ തരം വാഹന റജിസ്ട്രേഷൻ കാർഡുകളും (ആർസി) ഡ്രൈവിങ് ലൈസൻസും ആയിരിക്കും.
എല്ലാ വാഹന രേഖകളും ഡ്രൈവിങ് ലൈസൻസും സർക്കാരിന്റെ ഡിജിലോക്കറിലോ എം–പരിവാഹൻ പോർട്ടലിലോ സംസ്ഥാന വാഹന പോർട്ടലുകളിലോ ഡിജിറ്റലായി സൂക്ഷിക്കാം. പരിശോധനാ സമയത്ത് ഇതിന്റെ സോഫ്റ്റ് കോപ്പി കാണിച്ചാൽ മതി.
പിഴ ഓൺലൈനായി അടക്കണം. ഇതിന്റെ വിവരങ്ങൾ കേന്ദ്രീകൃത ഓൺലൈൻ ഡേറ്റാ ബേസിൽ 10 വർഷം സൂക്ഷിക്കും. വാഹന നമ്പറുമായി ലിങ്ക് ചെയ്‌ത ഫോൺ നമ്പറിലേക്കു വിവരങ്ങൾ എത്തും. കൂടാതെ, ഡ്രൈവ് ചെയ്യുമ്പോൾ മൊബൈൽ ഫോണുകൾ റൂട്ട് നാവിഗേഷനു വേണ്ടി മാത്രം ഉപയോഗിക്കാൻ കഴിയും.
നികുതി, ആരോഗ്യ ഇൻഷുറൻസ്
ഏഴു ലക്ഷം രൂപക്ക് മുകളിലുള്ള വിദേശ പണമിടപാടുകൾക്ക് 5% നികുതി ബാങ്കുകൾക്കും മറ്റും ഈടാക്കാം. മക്കളുടെ വിദേശ പഠനത്തിനും വിദേശത്തു ബന്ധുക്കളുടെ ചികിത്സക്കു പണം അയക്കുമ്പോഴും ചെലവേറും. വിദേശ ടൂർ പാക്കേജ് നൽകുന്നവർ, തുകയുടെ 5% ആദായ നികുതി ഈടാക്കണം. 2018- 19 വർഷത്തെ ആദായനികുതി റിട്ടേൺ വൈകി സമർപ്പിക്കാനും തിരുത്തി സമർപ്പിക്കാനുമുള്ള സമയ പരിധി നവംബർ 30 വരെ നീട്ടി. 2019–20ലെ റിട്ടേൺ നൽകാനുളള അവസാന തിയ്യതിയും നവംബർ 30 ആണ്.
17 രോഗങ്ങൾക്കു കൂടി പരിരക്ഷ ഏർപ്പെടുത്തിയതോടെ ആരോഗ്യ ഇൻഷുറൻസ് പ്രീമിയം കൂടും. കോവിഡ് 19നെയും ഇൻഷുറൻസ് പരിധിയിൽ കൊണ്ടുവന്നു.
ഡെബിറ്റ്, ക്രെഡിറ്റ് കാർഡുകൾ
ആർ‌ബി‌ഐ പുറപ്പെടുവിച്ച പുതിയ മാർഗ നിർ‌ദ്ദേശങ്ങൾ പ്രകാരം, കാർഡ് ഉപയോക്താക്കൾ‌ക്ക് ഇപ്പോൾ അന്തർ‌ദേശീയ-ഓൺലൈൻ ഇടപാടുകൾ, കോൺ‌ടാക്റ്റ്ലെസ് കാർഡ് ഇടപാടുകൾ എന്നിവക്കായി ഓപ്റ്റ്-ഇൻ, ഓപ്റ്റ്- ഔട്ട്‌ രജിസ്ട്രേഷൻ സൗകര്യമുണ്ട്.
എന്നാൽ, നിലവിൽ ഒരു ഓൺലൈൻ ഇടപാടും നടത്താത്ത കാർഡ് ഉപയോഗിച്ച് ഇനി ഓൺലൈൻ ഇടപാട് സാധിക്കില്ല. കാർഡ് ഉടമക്ക് ആവശ്യമുള്ള സേവനങ്ങൾ തിരഞ്ഞെടുക്കാം. എടിഎം സേവനം ആവശ്യമില്ലാത്തവർക്ക് അത് ബാങ്കിൽ അറിയിച്ചാൽ മതി. പ്രതിദിന ഇടപാടു പരിധിയും ഉപയോക്താക്കൾ‌ക്ക് തീരുമാനിക്കാം.
ടിവിക്ക് ഇനി വില കൂടും
ടിവി ഓപ്പൺ സെൽ പാനലിനുള്ള 5% ഇറക്കുമതി തീരുവ ഇളവ് അവസാനിച്ചു. 32 ഇഞ്ച് ടിവിക്ക് 600 രൂപ വരെയും 43 ഇഞ്ചിന് 1200–1500 രൂപ വരെയും വില ഉയർന്നേക്കാം. ആത്മനിർഭർ ഭാരതിന്റെ ഭാഗമായി ഓപ്പൺ സെൽ പാനലുകളുടെ ആഭ്യന്തര ഉത്പാദന ശേഷി വർദ്ധിപ്പിക്കുന്നത് ലക്ഷ്യമിട്ടാണ് ഇത്. ഒരു വർഷത്തെ ഇളവ് സെപ്റ്റംബർ 30 ന് അവസാനിച്ചു.
സൗജന്യ എൽപിജി പദ്ധതി അവസാനിച്ചു
പ്രധാൻമന്ത്രി ഉജ്വല യോജന (പി‌എം‌യു‌വൈ) പ്രകാരം സൗജന്യമായി ഗ്യാസ് കണക്ഷൻ ലഭിക്കുന്ന പദ്ധതി ഇന്നലെ (2020 സെപ്റ്റംബർ 30) അവസാനിച്ചു. കോവിഡ് പശ്ചാത്തലത്തിലാണു പദ്ധതി സെപ്റ്റംബർ വരെ നീട്ടിയത്.
മധുരത്തിന്റെ കാലാവധി പ്രദർശിപ്പിക്കണം
പാക്ക് ചെയ്യാതെ വിൽക്കുന്ന മധുര പലഹാരങ്ങളുടെ ഉപയോഗ കാലാവധി വ്യക്തമാക്കണമെന്ന ഭക്ഷ്യസുരക്ഷാ വകുപ്പിന്റെ നിർദ്ദേശം ഇന്ന് പ്രാബല്യത്തിൽ വരും. പാക്കറ്റില്ലാതെ വിൽക്കുന്ന ജിലേബി, ലഡു തുടങ്ങിയവക്ക് ഇന്നു മുതൽ ‘ബെസ്റ്റ് ബിഫോർ’ തിയ്യതി നിർബന്ധമാണ്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
