ന്യൂഡല്‍ഹി: 41-മത് ജിഎസ്ടി കൗണ്‍സില്‍ യോഗം ഇന്ന് നടക്കും. സംസ്ഥാനങ്ങള്‍ക്ക് നല്‍കുവാനുള്ള നഷ്ടപരിഹാരമായിരിക്കും യോഗത്തിന്റെ മുഖ്യ അജണ്ട. കോവിഡ് പ്രതിസന്ധി മൂലം സാമ്പത്തിക ബുദ്ധിമുട്ടുകള്‍ അനുഭവിക്കുന്ന സംസ്ഥാനങ്ങള്‍ക്ക് നഷ്ടപരിഹാരം നല്കുന്നതിനെക്കുറിച്ച് തര്‍ക്കങ്ങള്‍ തുടരുന്നതിനിടയിലാണ് ഇന്ന് യോഗം ചേരുക. വീഡിയോ കോണ്‍ഫറന്‍സിങ് വഴിയാണ് കൗണ്‍സില്‍ തീരുമാനിച്ചിരിക്കുന്നത്.
വിപണിയില്‍ നിന്ന് കടമെടുത്ത് കുടിശിക നല്‍കണമെന്ന സംസ്ഥാനങ്ങളുടെ നിര്‍ദ്ദേശം പരിഗണിക്കാന്‍ സാധ്യതയുണ്ട്. ജിഎസ്ടി നഷ്ടപരിഹാരം 5 വര്‍ഷം നല്കാമെന്നുള്ള വ്യവസ്ഥയില്‍ മാറ്റം വരുത്തണമെന്നും ഇത് 10 വര്‍ഷമായ് ഉയര്‍ത്തണമെന്നും അഭിപ്രായമുണ്ട്. ജിഎസ്ടി നഷ്ടപരിഹാരം നിലവിലെ രീതിയില്‍ നല്‍കാനാവില്ലെന്ന് കേന്ദ്രം തീരുമാനമെടുത്തത് പ്രതിഷേധങ്ങള്‍ക്ക് വഴി തെളിച്ചിരുന്നു. ഇരുചക്ര വാഹനങ്ങളുടെ നികുതി കുറക്കുന്നതുമായ് ബന്ധപ്പെട്ട കാര്യങ്ങളും ഇന്ന് നടക്കുന്ന യോഗത്തില്‍ ചര്‍ച്ച ചെയ്യും. മറ്റു വിഷയങ്ങള്‍ അടുത്ത മാസം 19ന് നടക്കുന്ന യോഗത്തിലാകും ചര്‍ച്ച ചെയ്യുക.
