തിരുവനന്തപുരം : ആംബുലന്സില് വച്ച് കോവിഡ് രോഗിയായ യുവതിയെ പീഡിപ്പിച്ച കേസില് മനുഷ്യാവകാശ കമ്മീഷന് സ്വമേധയാ കേസെടുത്തു. 15 ദിവസത്തിനകം അന്വേഷണത്തിന്റെ റിപ്പോര്ട്ട് സമര്പ്പിക്കാനാണ് മനുഷ്യാവകാശ കമ്മീഷന്റെ ഉത്തരവ്. സംസ്ഥാന പോലീസ് മേധാവിക്കും ആരോഗ്യ വകുപ്പ് സെക്രട്ടറിക്കുമാണ് അന്വേഷണത്തിന്റെ ഉത്തരവാദിത്വം. യുവതിയെ പീഡിപ്പിച്ചതുമായി ബന്ധപ്പെട്ട് മാദ്ധ്യമങ്ങളില് വന്ന വാര്ത്തകളുടെ അടിസ്ഥാനത്തിലാണ് അന്വേഷണത്തിന് ഉത്തരവിട്ടിരിക്കുന്നത്.
കോവിഡ് രോഗിയായ യുവതിയുമായി പോകുന്ന സമയത്താണ് ആംബുലന്സ് ഡ്രൈവര് അവരെ പീഡനത്തിനിരയാക്കിയത്. ആംബുലന്സില് മറ്റ് ആരോഗ്യപ്രവര്ത്തകരൊന്നും കൂടെ ഉണ്ടായിരുന്നില്ലെന്നാണ് ലഭിക്കുന്ന വിവരം. 108 ആംബുലന്സിന്റെ ഡ്രൈവറാണ് പീഡനം നടത്തിയത്. ആംബുലന്സ് ഡ്രൈവര്മാര്ക്ക് എതിരെ നേരത്തെ ഉയര്ന്ന ആരോപണങ്ങള് കണക്കിലെടുത്തു ആംബുലന്സ് ഡ്രൈവര്മാരുടെ പ്രവര്ത്തനം നിരീക്ഷിക്കണമെന്ന് മനുഷ്യാവകാശ കമ്മീഷന് നേരത്തെ തന്നെ ഉത്തരവ് നല്കിയിരുന്നു. തിരുവനന്തപുരം മെഡിക്കല് കോളേജ് ആശുപത്രിയില് ഓടുന്ന ആംബുലന്സുകള്ക്ക് എതിരെ ആയിരുന്നു അന്ന് ആരോപണം ഉയര്ന്നിരുന്നത്. ഇതിന്റെ ഭാഗമായാണ് മനുഷ്യാവകാശ കമ്മീഷന് അധ്യക്ഷന് ജസ്റ്റിസ് ആന്റണി ഡൊമനിക് അന്ന് സംസ്ഥാന പോലീസ് മേധാവിക്ക് നിര്ദ്ദേശം നല്കിയത്.